ടോക്കിയോയിൽ നടക്കുന്ന ജപ്പാൻ ഓപ്പൺ ബാഡ്മിന്റൺ ടൂർണമെന്റിന്റെ സെമിഫൈനലിൽ പ്രവേശിച്ച് ഇന്ത്യൻ താരം പിവി സിന്ധു (PV Sindhu Japan Open). എതിരാളിയായ ജപ്പാന്റെ നൊസോമി ഒകുഹാര ടൂർണമെന്റിൽ നിന്ന് പിന്മാറിയതിനെത്തുടർന്നാണ് സിന്ധു അവസാന നാലിൽ ഇടംപിടിച്ചത്. ഈ സീസണിൽ സിന്ധുവിന്റെ മൂന്നാമത്തെ സെമിഫൈനൽ പ്രവേശനമാണിത്.
സെമിഫൈനലിൽ ഒളിമ്പിക് ചാമ്പ്യനും ലോക നാലാം നമ്പർ താരവുമായ ചൈനയുടെ ചെൻ യുഫെയെയാണ് സിന്ധു നേരിടുന്നത്. മുൻപ് ഏറ്റുമുട്ടിയപ്പോൾ എട്ടു തവണ യുഫെയും ആറു തവണ സിന്ധുവും വിജയിച്ചിട്ടുണ്ടെങ്കിലും, കഴിഞ്ഞ അഞ്ച് മത്സരങ്ങളിലും സിന്ധുവിന് പരാജയം രുചിക്കേണ്ടി വന്നിട്ടുണ്ട്. ഈ മത്സരം വിജയിച്ചാൽ കഴിഞ്ഞ മൂന്ന് വർഷത്തിനിടയിലെ സിന്ധുവിന്റെ ആദ്യത്തെ സൂപ്പർ 750 ഫൈനൽ പ്രവേശനമായിരിക്കും ഇത്. നേരത്തെ ചൈനയുടെ ഹാൻ യുവിനെ 21-16, 21-14 എന്ന സ്കോറിന് തോൽപ്പിച്ചാണ് സിന്ധു ക്വാർട്ടറിലെത്തിയത്.
മറ്റു മത്സരങ്ങളിൽ ഇന്ത്യൻ താരങ്ങൾക്ക് തിരിച്ചടി നേരിട്ടു. മിക്സഡ് ഡബിൾസിൽ ധ്രുവ് കപില-തനിഷ ക്രാസ്റ്റോ സഖ്യവും, വനിതാ സിംഗിൾസിൽ ഉന്നതി ഹൂഡയും പുറത്തായി. നേരത്തെ പുരുഷ ഡബിൾസിൽ സാത്വിക്-ചിരാഗ് സഖ്യവും എംആർ അർജുൻ-ഹരിഹരൻ സഖ്യവും ആദ്യ റൗണ്ടിൽ തന്നെ പുറത്തായിരുന്നു. ടൂർണമെന്റിൽ അവശേഷിക്കുന്ന ഒരേയൊരു ഇന്ത്യൻ പ്രതീക്ഷയാണ് സിന്ധു.
Summary: Indian shuttler PV Sindhu has advanced to the Japan Open semifinals following the withdrawal of her opponent, Nozomi Okuhara. Sindhu will now face world No. 4 Chen Yufei, aiming to break a five-match losing streak against the Chinese star and secure her first Super 750 final appearance in three years.
