ആദിലാബാദ്: തമിഴ്നാട് മുഖ്യമന്ത്രി വിജയ്യെ നേരിൽ കണ്ട് അഭിനന്ദിക്കണമെന്ന ലക്ഷ്യത്തോടെ ഉത്തർപ്രദേശിൽ നിന്ന് തമിഴ്നാട്ടിലേക്ക് കാൽനട യാത്ര ആരംഭിച്ച് 24-കാരൻ (Uttar Pradesh Youth Foot March). ഉത്തർപ്രദേശിലെ അലിഗഢ് സ്വദേശിയായ അമൻ എന്ന യുവാവാണ് ദേശീയപതാകയേന്തി ആയിരക്കണക്കിന് കിലോമീറ്റർ ദൈർഘ്യമുള്ള യാത്ര നടത്തുന്നത്. ജൂലൈ 3-ന് അലിഗഢിൽ നിന്ന് ആരംഭിച്ച യാത്ര ഇതിനകം തെലങ്കാനയിലെ ആദിലാബാദ് ജില്ലയിൽ എത്തിയിരിക്കുകയാണ്. ഹൈദരാബാദ് വഴി തമിഴ്നാട്ടിലേക്ക് പ്രവേശിച്ച് അടുത്ത രണ്ടാഴ്ചയ്ക്കുള്ളിൽ ലക്ഷ്യസ്ഥാനത്തെത്താനാണ് അമന്റെ പദ്ധതി.
തമിഴ്നാട് മുഖ്യമന്ത്രി വിജയിയുടെ വികസന കാഴ്ചപ്പാടും ജനക്ഷേമ പദ്ധതികളുമാണ് ഈ യാത്രയ്ക്ക് പ്രചോദനമായതെന്ന് അമൻ പറഞ്ഞു. സംസ്ഥാനത്തിന്റെ വികസനത്തിനും ജനകീയ ഭരണത്തിനും അഭിനന്ദനം അറിയിക്കാനാണ് നേരിൽ കാണാൻ ആഗ്രഹിക്കുന്നതെന്നും അദ്ദേഹം വ്യക്തമാക്കി. ഇന്ത്യയ്ക്ക് വികസനത്തിന് മുൻഗണന നൽകുന്ന കൂടുതൽ നേതാക്കൾ ആവശ്യമാണെന്നും, ദേശീയ രാഷ്ട്രീയത്തിലും വിജയി കൂടുതൽ സജീവമാകണമെന്ന് അഭ്യർഥിക്കാനാണ് താൻ ആഗ്രഹിക്കുന്നതെന്നും അമൻ പ്രാദേശിക മാധ്യമങ്ങളോട് പറഞ്ഞു.
ദീർഘദൂര കാൽനട യാത്രയിൽ അമന് ഇതിനകം അനുഭവമുണ്ട്. 2025-ൽ അലിഗഢിൽ നിന്ന് ഹൈദരാബാദിലേക്ക് കാൽനടയായി സഞ്ചരിച്ച് എഐഎംഐഎം അധ്യക്ഷനും ഹൈദരാബാദ് എംപിയുമായ അസദുദ്ദീൻ ഒവൈസിയെ അദ്ദേഹം നേരിൽ കണ്ടിരുന്നു.
ആ യാത്ര വിജയകരമായി പൂർത്തിയാക്കി ലക്ഷ്യം കൈവരിച്ചതാണ് വീണ്ടും സമാനമായ ദൗത്യത്തിന് പ്രചോദനമായതെന്ന് അമൻ പറയുന്നു.
യാത്രയ്ക്കിടെ വിവിധ ഗ്രാമങ്ങളിലെയും നഗരങ്ങളിലെയും ആളുകൾ ഭക്ഷണവും കുടിവെള്ളവും താമസസൗകര്യവും നൽകി സഹായിക്കുന്നുണ്ടെന്നും, പലരും തന്റെ ലക്ഷ്യത്തെക്കുറിച്ച് ചോദിച്ചറിഞ്ഞ് പ്രോത്സാഹനം നൽകുന്നുണ്ടെന്നും അമൻ പറഞ്ഞു.
ദേശീയപതാക കൈവിടാതെ തുടരുന്ന ഈ യാത്ര സമൂഹമാധ്യമങ്ങളിലും ശ്രദ്ധ നേടുന്നുണ്ട്.
Summary: A 24-year-old man from Aligarh, Uttar Pradesh, has begun a cross-country foot march to Tamil Nadu to meet Chief Minister Vijay. Inspired by Vijay’s governance and development initiatives, Aman hopes to congratulate him personally and encourage him to play a larger role in national politics.
