തിരുവനന്തപുരം: വരാനിരിക്കുന്ന ആഭ്യന്തര ക്രിക്കറ്റ് സീസണിൽ കേരളത്തിന്റെ ജയസാധ്യതകൾക്ക് കരുത്തുപകരാൻ സീനിയർ പുരുഷ ടീമിനായി സംഘടിപ്പിച്ച പ്രത്യേക ഫിറ്റ്നസ് ക്യാമ്പ് അവസാന ഘട്ടത്തിലേക്ക് (KCA fitness camp). ഐ.പി.എല്ലിൽ (IPL) രാജസ്ഥാൻ റോയൽസിന്റെ സ്ട്രെങ്ത് ആൻഡ് കണ്ടീഷനിംഗ് പരിശീലകനായി തിളങ്ങിയ പ്രമുഖ കായിക വിദഗ്ധൻ എ.ടി. രാജാമണി പ്രഭുവാണ് ഈ അത്യാധുനിക ക്യാമ്പിന് നേതൃത്വം നൽകുന്നത്. കേരള ക്രിക്കറ്റ് അസോസിയേഷന്റെ (KCA) ആഭിമുഖ്യത്തിൽ ജൂൺ 15-ന് ആരംഭിച്ച പ്രത്യേക പരിശീലന ക്യാമ്പ് ജൂൺ 20-ന് (നാളെ) സമാപിക്കും. തിരുവനന്തപുരം മംഗലപുരത്തുള്ള കെ.സി.എ ക്രിക്കറ്റ് സ്റ്റേഡിയമാണ് ക്യാമ്പിന് വേദിയാകുന്നത്.
ക്രിക്കറ്റ് ലോകത്തെ കൗമാര വിസ്മയം വൈഭവ് സൂര്യവംശി, ഇന്ത്യൻ സൂപ്പർ താരം രവിചന്ദ്രൻ അശ്വിൻ, എസ്. ബദരീനാഥ്, എൽ. ബാലാജി, മുഹമ്മദ് സിറാജ് എന്നിവരുൾപ്പെടെയുള്ള മുൻനിര താരങ്ങളെ രാജ്യാന്തര നിലവാരത്തിലേക്ക് ഉയർത്തുന്നതിൽ നിർണായക പങ്കുവഹിച്ച വ്യക്തിയാണ് എ.ടി. രാജാമണി പ്രഭു. മുൻപ് ശ്രീലങ്കൻ ദേശീയ ക്രിക്കറ്റ് ടീമിനൊപ്പവും അദ്ദേഹം ദീർഘകാലം പ്രവർത്തിച്ചിട്ടുണ്ട്.
ആധുനിക ക്രിക്കറ്റിൽ കായികക്ഷമതയ്ക്കുള്ള പ്രാധാന്യം കണക്കിലെടുത്താണ് സീസണ മുന്നോടിയായി കെ.സി.എ ഇത്രയും വിപുലമായ ക്യാമ്പ് സംഘടിപ്പിച്ചിരിക്കുന്നത്. താരങ്ങളുടെ ശാരീരികക്ഷമത വർദ്ധിപ്പിക്കുന്നതിനൊപ്പം മത്സരങ്ങൾക്കിടയിൽ പരിക്കുകൾ (Injuries) ഒഴിവാക്കാനുള്ള ശാസ്ത്രീയ പരിശീലന മുറകളും ക്യാമ്പിന്റെ ഭാഗമായി നൽകുന്നുണ്ട്. ഓരോ കളിക്കാരന്റെയും ശാരീരികവും മാനസികവുമായ പ്രത്യേകതകൾ പ്രത്യേകം വിലയിരുത്തി അവർക്ക് അനുയോജ്യമായ ഡയറ്റും വർക്കൗട്ടുകളുമാണ് രാജാമണി പ്രഭു നിശ്ചയിച്ചിരിക്കുന്നത്.
Story Summary:
The Kerala Cricket Association’s (KCA) specialized fitness camp for the senior men’s team is concluding tomorrow at the Mangalapuram KCA Stadium. Led by notable sports expert and Rajasthan Royals strength coach AT Rajamani Prabhu, the camp focuses on scientific training and injury prevention. Rajamani, who has previously trained stars like Ravichandran Ashwin and Mohammad Siraj, designed customized routines to boost players’ form ahead of the upcoming domestic season.
