തിരുവനന്തപുരം: ക്രിക്കറ്റ് ആരാധകർക്ക് ആവേശമായി വെസ്റ്റ് ഇൻഡീസിന്റെ ഇന്ത്യൻ പര്യടനത്തിന് വേദികൾ നിശ്ചയിച്ചു. സെപ്റ്റംബറിൽ ആരംഭിക്കുന്ന പര്യടനത്തിലെ ആദ്യ ഏകദിന മത്സരത്തിന് തിരുവനന്തപുരം കാര്യവട്ടം ഗ്രീൻഫീൽഡ് സ്റ്റേഡിയം വേദിയാകും. സെപ്റ്റംബർ 27-നാണ് ഈ മത്സരം നടക്കുക.(Karyavattom to kick off Windies tour, First ODI on September 27)
പരമ്പരയിൽ ആകെ മൂന്ന് ഏകദിന മത്സരങ്ങളാണുള്ളത്. ആദ്യ ഏകദിനം: സെപ്റ്റംബർ 27 – തിരുവനന്തപുരം (കാര്യവട്ടം), രണ്ടാം ഏകദിനം: സെപ്റ്റംബർ 30 – ഗുവാഹത്തി, മൂന്നാം ഏകദിനം: ഒക്ടോബർ 03 – ചണ്ഡിഗഡ് എന്നിങ്ങനെയാണ്.
ഏകദിന പരമ്പരയ്ക്ക് പിന്നാലെ അഞ്ച് മത്സരങ്ങളടങ്ങിയ ടി20 പരമ്പരയും നടക്കും. ഒക്ടോബർ ആറിന് ആരംഭിക്കുന്ന ടി20 പരമ്പര ഒക്ടോബർ 17-നാണ് സമാപിക്കുന്നത്. ലഖ്നൗ, റാഞ്ചി, ഇൻഡോർ, ഹൈദരാബാദ്, ബെംഗളൂരു എന്നിവയാണ് വേദികൾ. കാര്യവട്ടത്ത് വീണ്ടും അന്താരാഷ്ട്ര മത്സരം എത്തുന്നതോടെ കായിക പ്രേമികൾ വലിയ ആവേശത്തിലാണ്.
