കൊൽക്കത്ത: പശ്ചിമ ബംഗാളിലെ സൗത്ത് 24 പർഗാനാസ് ജില്ലയിൽ 15 ബൂത്തുകളിൽ നടക്കുന്ന റീപോളിംഗിനിടെ തൃണമൂൽ കോൺഗ്രസ് – ബിജെപി പ്രവർത്തകർ തമ്മിൽ വൻ സംഘർഷം (West Bengal Repolling Clashes TMC BJP). തിരഞ്ഞെടുപ്പ് ക്രമക്കേടുകൾ നടന്നെന്ന പരാതിയെത്തുടർന്ന് തിരഞ്ഞെടുപ്പ് കമ്മീഷൻ ഉത്തരവിട്ട റീപോളിംഗിനിടെയാണ് ആക്രമണങ്ങൾ അരങ്ങേറിയത്.
മഗരാഹട്ട് പശ്ചിം അസംബ്ലി മണ്ഡലത്തിലെ 11 ബൂത്തുകളിലും ഡയമണ്ട് ഹാർബറിലെ 4 ബൂത്തുകളിലുമാണ് ഇന്ന് റീപോളിംഗ് നടന്നത്. ഫാൽത്ത മേഖലയിൽ തൃണമൂൽ പ്രവർത്തകർ വോട്ടർമാരെ ഭീഷണിപ്പെടുത്തുന്നതായും വീടുകൾ കത്തിക്കുമെന്ന് മുന്നറിയിപ്പ് നൽകുന്നതായും പ്രദേശവാസികൾ ആരോപിച്ചു. ഉച്ചയ്ക്ക് 2 മണി വരെയുള്ള കണക്കനുസരിച്ച് മഗരാഹട്ട് പശ്ചിമിൽ 56.33 ശതമാനവും ഡയമണ്ട് ഹാർബറിൽ 54.9 ശതമാനവുമാണ് പോളിംഗ് രേഖപ്പെടുത്തിയത്. ആകെ പോളിംഗ് 55.57 ശതമാനമാണ്.
ഇവിഎം സൂക്ഷിച്ചിരിക്കുന്ന സ്ട്രോങ്ങ് റൂമുകളിൽ ക്രമക്കേട് നടന്നതായി തൃണമൂലും ബിജെപിയും പരസ്പരം ആരോപിച്ചു. അനുമതിയില്ലാതെ തപാൽ ബാലറ്റുകൾ തരംതിരിച്ചുവെന്ന പരാതിയിൽ അന്വേഷണം നടക്കുകയാണ്. കേരള നിയമസഭാ തിരഞ്ഞെടുപ്പ് ഫലത്തിനൊപ്പം മെയ് 4 തിങ്കളാഴ്ചയാണ് ബംഗാളിലെയും വോട്ടെണ്ണൽ നിശ്ചയിച്ചിരിക്കുന്നത്. ബംഗാളിലെ സംഘർഷാവസ്ഥ കണക്കിലെടുത്ത് കനത്ത സുരക്ഷാ സന്നാഹങ്ങളാണ് പോളിംഗ് കേന്ദ്രങ്ങളിൽ ഏർപ്പെടുത്തിയിരിക്കുന്നത്. സ്ത്രീകളടക്കമുള്ള വോട്ടർമാർ തങ്ങൾക്കെതിരെയുള്ള ഭീഷണിയിൽ ആശങ്ക പ്രകടിപ്പിച്ചു.
Summary: Clashes erupted between Trinamool Congress and BJP supporters in West Bengal’s South 24 Parganas during repolling at 15 booths. The Election Commission ordered the repoll following allegations of malpractice in the Magrahat Paschim and Diamond Harbour constituencies. Residents in Falta alleged intimidation and threats from TMC workers ahead of the vote counting on Monday. As of 2 pm, the overall voter turnout stood at 55.57%. Both parties have also raised concerns over strong room security and EVM safety.
