ചെന്നൈ: തമിഴ്നാട്ടിൽ ദ്വിഭാഷാ നയം തുടരുമെന്ന് തമിഴക വെട്രി കഴകം (TVK) തലവനും മുഖ്യമന്ത്രിയുമായ വിജയ് നിയമസഭയിൽ ആവർത്തിച്ചു. തമിഴ്നാട്ടിലെ നിലവിലെ ഭാഷാ തർക്കങ്ങൾക്കിടയിലാണ് മുഖ്യമന്ത്രിയുടെ ഈ സുപ്രധാന പ്രഖ്യാപനം.(Tamil Nadu CM Vijay Reaffirms Two Language Policy And Criticises Opposition In Assembly)
തന്റെ രാഷ്ട്രീയ വളർച്ച തടയാൻ ഡി.എം.കെയും എ.ഐ.എ.ഡി.എം.കെയും കൈകോർത്തുവെന്ന് നിയമസഭയിലെ പ്രസംഗത്തിൽ വിജയ് ആരോപിച്ചു. സ്റ്റാലിൻ നേതൃത്വം നൽകുന്ന ഡി.എം.കെ സർക്കാർ മുൻകാലങ്ങളിൽ ടാസ്മാക് വരുമാനം പാർട്ടിയുടെ ആവശ്യങ്ങൾക്കായി കൊള്ളയടിച്ചെന്നും, ഇത് സംസ്ഥാനത്തെ ജനങ്ങളെ വല്ലാതെ ബുദ്ധിമുട്ടിച്ചെന്നും അദ്ദേഹം വിമർശിച്ചു.
അധികാരമേറ്റ ആദ്യ മാസങ്ങളിൽ തന്നെ നിരവധി ജനക്ഷേമ പ്രവർത്തനങ്ങൾ ചെയ്യാൻ തന്റെ സർക്കാരിന് സാധിച്ചെന്ന് വിജയ് ചൂണ്ടിക്കാട്ടി. മുടങ്ങിക്കിടന്ന ജൽ ജീവൻ മിഷൻ പദ്ധതി പുനരാരംഭിക്കാൻ കഴിഞ്ഞു. കൂടാതെ, സംസ്ഥാനത്തെ സ്ത്രീകളുടെ ആവശ്യം കണക്കിലെടുത്ത് 700-ലധികം സർക്കാർ മദ്യശാലകൾ പൂട്ടാൻ തന്റെ സർക്കാർ തീരുമാനിച്ചതായും അദ്ദേഹം അറിയിച്ചു. തന്റെ രാഷ്ട്രീയ യാത്രയിൽ നേരിട്ട വെല്ലുവിളികളെക്കുറിച്ചും വിജയ് നിയമസഭയിൽ സംസാരിച്ചു. തിരഞ്ഞെടുപ്പ് പ്രചാരണ കാലയളവിൽ തന്റെ റാലികൾക്ക് പ്രത്യേക നിയന്ത്രണങ്ങൾ ഏർപ്പെടുത്തിയെന്നും അദ്ദേഹം പരാമർശിച്ചു.
2025 സെപ്റ്റംബറിൽ തന്റെ റാലിക്കിടെയുണ്ടായ കരുർ ദുരന്തത്തിൽ 41 പേർ മരിച്ച സംഭവത്തിൽ അദ്ദേഹം അതീവ ദുഃഖം രേഖപ്പെടുത്തി. സംഭവത്തിന്റെ ഉത്തരവാദിത്തം തന്റെ തലയിൽ കെട്ടിവെക്കാനുള്ള ശ്രമങ്ങൾ വേദനിപ്പിച്ചുവെന്ന് വിജയ് പറഞ്ഞു. റാലിയിൽ പങ്കെടുത്തവർക്ക് ആവശ്യമായ സുരക്ഷയൊരുക്കുന്നതിൽ പോലീസ് സംവിധാനത്തിന് വീഴ്ച സംഭവിച്ചെന്നും അദ്ദേഹം കുറ്റപ്പെടുത്തി. നീറ്റ് പരീക്ഷ തമിഴ്നാട്ടിലെ വിദ്യാർത്ഥികളോട് കാണിക്കുന്ന അനീതിയാണെന്നും, പ്ലസ് ടു മാർക്കിന്റെ അടിസ്ഥാനത്തിൽ പ്രവേശനം നടത്തണമെന്നുമുള്ള തന്റെ പഴയ നിലപാട് മുഖ്യമന്ത്രി വിജയ് ആവർത്തിച്ചു. സംസ്ഥാനത്തെ ക്രമസമാധാന നില മെച്ചപ്പെടുത്തുമെന്ന് നിയമസഭയിൽ അദ്ദേഹം ഉറപ്പുനൽകി.
Story Summary
Tamil Nadu Chief Minister and TVK chief Vijay reaffirmed the state’s two-language policy during his legislative address, while launching a scathing attack against the opposition DMK and AIADMK. Highlighting his government’s early achievements—including shutting down over 700 liquor shops and reviving the Jal Jeevan Mission—he also addressed the 2025 Karur stampede and reiterated his firm opposition to the NEET examination, calling for admissions based on Class 12 marks.
