ചെന്നൈ: തമിഴ്നാടിന്റെ 2026-27 സാമ്പത്തിക വർഷത്തേക്കുള്ള ബജറ്റ് ധനകാര്യ മന്ത്രി ഡോ. എൻ. മേരി വിൽസൺ നിയമസഭയിൽ അവതരിപ്പിച്ചു. 2031-ഓടെ സംസ്ഥാനത്തെ 1.5 ട്രില്യൺ ഡോളർ സമ്പദ്വ്യവസ്ഥയാക്കി മാറ്റാനുള്ള ലക്ഷ്യമാണ് ബജറ്റ് മുന്നോട്ടുവെക്കുന്നത്. മുഖ്യമന്ത്രി വിജയുടെ നേതൃത്വത്തിൽ തത്ത്വാധിഷ്ഠിതമായ ഭരണസംവിധാനം ഉറപ്പാക്കിയാണ് സർക്കാർ മുന്നേറുന്നതെന്ന് ധനമന്ത്രി സഭയെ അറിയിച്ചു.(Tamil Nadu Budget 2026-27 TVK Government Sets Target For 1.5 Trillion Dollar Economy)
വിദ്യാഭ്യാസ മേഖലയുടെ ആധുനികവൽക്കരണത്തിനാണ് ബജറ്റ് വലിയ ഊന്നൽ നൽകുന്നത്. 3,734 സർക്കാർ സ്കൂളുകൾ നവീകരിക്കുന്നതിനായി 300 കോടി രൂപ വകയിരുത്തി. ആദ്യഘട്ടത്തിൽ 10,000 സ്കൂളുകളിൽ ശുചിത്വവും സുരക്ഷയും ഉറപ്പാക്കുന്ന ‘സൂപ്പർ ക്ലീൻ, സൂപ്പർ ക്യാമ്പസ്’ പദ്ധതിക്കായി 139 കോടി രൂപ അനുവദിച്ചു. കോളേജ് വിദ്യാർത്ഥികളുടെ ഡിജിറ്റൽ പഠനം ശക്തിപ്പെടുത്തുന്നതിനായി ‘വെട്രി ലാപ്ടോപ്പ് സ്കീം’ നടപ്പിലാക്കും. കൂടാതെ, പ്ലസ്ടു പൊതുപരീക്ഷാ മാർക്കിന്റെ അടിസ്ഥാനത്തിൽ തന്നെ മെഡിക്കൽ പ്രവേശനം പുനഃസ്ഥാപിക്കണമെന്ന് ധനമന്ത്രി കേന്ദ്ര സർക്കാരിനോട് ആവശ്യപ്പെട്ടു.
സ്കൂൾ വിദ്യാഭ്യാസ വകുപ്പിന് 44,527 കോടി രൂപയും ഉന്നതവിദ്യാഭ്യാസ വകുപ്പിന് 8,393 കോടി രൂപയുമാണ് ഈ വർഷം നീക്കിവെച്ചിരിക്കുന്നത്. ഗ്രാമീണ മേഖലയിലെ നിർദ്ധനരായ വിദ്യാർത്ഥികൾക്കായി ‘പെരുന്തലൈവർ കാമരാജർ മാതൃകാ സ്കൂളുകൾ’ പദ്ധതി വഴി താമസവും സൗജന്യ ചികിത്സയും പഠനസൗകര്യവും നൽകും. മധുരയിൽ പുതിയ സ്പെഷ്യൽ ലാ കോളേജും 90 കോടി രൂപ ചെലവിൽ 5 പുതിയ വ്യാവസായിക പരിശീലന കേന്ദ്രങ്ങളും (ITI) സ്ഥാപിക്കും.
കഴിഞ്ഞ 5 വർഷത്തിനിടെ സംസ്ഥാനത്തിന്റെ കടബാധ്യത ഇരട്ടിയായ കാര്യം ചൂണ്ടിക്കാട്ടിയ മന്ത്രി, മുൻകാലങ്ങളിലെപ്പോലെ പ്രത്യേക വ്യക്തികൾക്കോ രാഷ്ട്രീയ പങ്കാളികൾക്കോ കോൺട്രാക്റ്റുകൾ നൽകാതെ ടെൻഡറുകളിൽ സുതാര്യത കൊണ്ടുവന്നതായി വ്യക്തമാക്കി. മദ്യനിർമ്മാണ ശാലകളിൽ പ്രത്യേക ലെവി ചുമത്തുന്നതിലൂടെ 1,000 കോടി രൂപയുടെ അധിക വരുമാനവും സർക്കാർ പ്രതീക്ഷിക്കുന്നു. 200 യൂണിറ്റ് സൗജന്യ വൈദ്യുതി ഉൾപ്പെടെയുള്ള ജനക്ഷേമ പദ്ധതികൾ തുടരുമെന്നും മന്ത്രി വ്യക്തമാക്കി.
Story Summary
Tamil Nadu Finance Minister Marie Wilson presented the 2026-27 Budget under Chief Minister Vijay’s TVK government, targeting a $1.5 trillion economy by 2031. Key highlights include a major boost for school and higher education, the Vetri Laptop scheme, and measures for fiscal transparency and additional revenue generation.
