ചെന്നൈ: ഡിഎംകെ-കോൺഗ്രസ് സഖ്യം തകർച്ചയിലാണെന്ന ബിജെപിയുടെ വിമർശനങ്ങൾക്ക് മറുപടിയുമായി തമിഴ്നാട് മുഖ്യമന്ത്രി എം.കെ. സ്റ്റാലിൻ. താനും രാഹുൽ ഗാന്ധിയും ഒരേ ലക്ഷ്യത്തോടെയാണ് പ്രവർത്തിക്കുന്നതെന്നും സഖ്യത്തിന്റെ വിജയത്തിനായി രണ്ട് ദിശകളിലായി പ്രചാരണം നടത്തുകയാണെന്നും അദ്ദേഹം വ്യക്തമാക്കി (Stalin Rahul Gandhi Tamil Nadu Campaign). സഖ്യകക്ഷികൾക്കിടയിൽ ഭിന്നതയുണ്ടെന്ന കേന്ദ്രമന്ത്രി പിയൂഷ് ഗോയലിന്റെ പ്രസ്താവനയോട് പ്രതികരിക്കുകയായിരുന്നു അദ്ദേഹം.
രാഹുൽ ഗാന്ധിയും താനും ഒരേ വേദിയിൽ എത്തുന്നില്ലെന്ന വിമർശനത്തിന് സ്റ്റാലിൻ മറുപടി നൽകി. സഖ്യത്തിന്റെ വിജയത്തിനായി താൻ ചെന്നൈ കേന്ദ്രീകരിച്ചും രാഹുൽ തെക്കൻ തമിഴ്നാട്ടിലും നാളെ പ്രചാരണം നടത്തുമെന്ന് അദ്ദേഹം അറിയിച്ചു. മോദിക്ക് കീഴടക്കാൻ കഴിയാത്ത സ്റ്റാലിന് പകരം ഒരു അടിമക്കൂട്ടത്തെ അധികാരത്തിൽ എത്തിക്കാനാണ് ബിജെപി ശ്രമിക്കുന്നതെന്ന രാഹുലിന്റെ വാക്കുകളെ സ്റ്റാലിൻ സ്വാഗതം ചെയ്തു. രാഹുലിന്റെ വാക്കുകൾ സഖ്യത്തിന് വലിയ കരുത്താണെന്നും അദ്ദേഹം പറഞ്ഞു.
വനിതാ സംവരണ ബിൽ പരാജയപ്പെട്ടത് സ്റ്റാലിനും കുടുംബവും ആഘോഷിച്ചുവെന്നും സ്റ്റാലിൻ സ്ത്രീവിരുദ്ധനാണെന്നും പിയൂഷ് ഗോയൽ നേരത്തെ കുറ്റപ്പെടുത്തിയിരുന്നു. കുടുംബവാഴ്ചയാണ് ഡിഎംകെയിൽ നടക്കുന്നതെന്നും ഉദയനിധിയെ മുഖ്യമന്ത്രിയാക്കില്ലെന്ന് പറയാൻ സ്റ്റാലിന് ധൈര്യമുണ്ടോയെന്നും ഗോയൽ വെല്ലുവിളിച്ചിരുന്നു. തമിഴ്നാട്ടിൽ എൻഡിഎ സഖ്യം സുരക്ഷിതമാണെന്നും എന്നാൽ ഡിഎംകെ-കോൺഗ്രസ് സഖ്യത്തിൽ അസ്വാരസ്യങ്ങൾ പുകയുകയാണെന്നുമാണ് ബിജെപിയുടെ അവകാശവാദം. തിരഞ്ഞെടുപ്പ് പ്രചാരണം അവസാന ഘട്ടത്തിലേക്ക് കടക്കവെ തമിഴ്നാട്ടിൽ ഭരണ-പ്രതിപക്ഷ ചേരികൾ തമ്മിലുള്ള പോരാട്ടം കൂടുതൽ ശക്തമായിരിക്കുകയാണ്.
Summary: Tamil Nadu CM M.K. Stalin has countered BJP’s claims of a rift within the DMK-Congress alliance. Responding to Union Minister Piyush Goyal’s criticism, Stalin clarified that he and Rahul Gandhi are working toward a common goal from different regions to ensure maximum reach; while he campaigns in Chennai, Rahul will focus on Southern Tamil Nadu tomorrow. Earlier, Goyal had attacked Stalin, calling him “anti-women” for allegedly celebrating the failure of the Women’s Reservation Bill and challenging him on nepotism regarding Udhayanidhi Stalin’s political future.
