ഷില്ലോങ്: മേഘാലയയിൽ ഹണിമൂണിനിടെ ഭർത്താവിനെ കൊലപ്പെടുത്തിയ കേസിൽ പ്രതിയായ സോനം രഘുവംശിക്ക് ജാമ്യം ലഭിച്ചത് പോലീസ് രേഖകളിലെ ഗുരുതരമായ സാങ്കേതിക പിഴവ് മൂലം (Sonam Raghuvanshi Bail Honeymoon Murder). ഭാരതീയ ന്യായ സംഹിതയിലെ നിലവിലില്ലാത്ത വകുപ്പുകൾ അറസ്റ്റ് രേഖകളിൽ ഉൾപ്പെടുത്തിയത് പ്രതിക്ക് തുണയാകുകയായിരുന്നു.
കൊലപാതക കുറ്റത്തിന് BNS സെക്ഷൻ 103 പ്രകാരമാണ് എഫ്ഐആർ രജിസ്റ്റർ ചെയ്തത്. എന്നാൽ സോനത്തെ അറസ്റ്റ് ചെയ്തതിന്റെ കാരണങ്ങൾ വ്യക്തമാക്കുന്ന രേഖകളിൽ ഉൾപ്പെടുത്തിയത് സെക്ഷൻ 403 (1) ആണ്. പുതിയ നിയമമായ BNS-ൽ ഇങ്ങനെയൊരു വകുപ്പ് നിലവിലില്ല. പഴയ ഐപിസിയിൽ സ്വത്ത് തട്ടിയെടുക്കുന്നതുമായി ബന്ധപ്പെട്ടതായിരുന്നു 403-ാം വകുപ്പ്. അറസ്റ്റ് മെമ്മോ, ഇൻസ്പെക്ഷൻ മെമ്മോ തുടങ്ങി സോനവുമായി ബന്ധപ്പെട്ട ഒരു രേഖയിലും 103-ാം വകുപ്പ് ചേർത്തിട്ടില്ലെന്ന് ഈസ്റ്റ് ഖാസി ഹിൽസ് ജില്ലാ കോടതി നിരീക്ഷിച്ചു. അറസ്റ്റ് ചെയ്യുന്ന വ്യക്തിയെ എന്തിനാണ് തടങ്കലിൽ വെക്കുന്നത് എന്ന് കൃത്യമായി അറിയിക്കേണ്ടത് ഭരണഘടനാപരമായ അവകാശമാണെന്നും കോടതി വ്യക്തമാക്കി. ആദ്യമായി കോടതിയിൽ ഹാജരാക്കിയപ്പോൾ സോനത്തിന് വേണ്ടി വാദിക്കാൻ അഭിഭാഷകൻ ഉണ്ടായിരുന്നില്ല. അതിനാൽ ഇത്തരം പിഴവുകൾ നേരത്തെ ചൂണ്ടിക്കാണിക്കാൻ സാധിച്ചില്ല എന്ന പ്രതിഭാഗത്തിന്റെ വാദം കോടതി അംഗീകരിച്ചു.
ഇൻഡോറിലെ വ്യവസായിയായ രാജ രഘുവംശിയും സോനവും 2025 മെയ് 11-നാണ് വിവാഹിതരായത്. മെയ് 20-ന് ഇവർ ഹണിമൂണിനായി മേഘാലയയിലേക്ക് പോയി. ജൂൺ രണ്ടിന് രാജയെ മരിച്ച നിലയിൽ കണ്ടെത്തുകയായിരുന്നു. സോനം തന്റെ കാമുകനായ രാജ് കുശ്വാഹയുമായി ചേർന്ന് നടത്തിയ ആസൂത്രിത കൊലപാതകമായിരുന്നു ഇതെന്ന് പോലീസ് കണ്ടെത്തി. ക്വട്ടേഷൻ സംഘത്തെ ഉപയോഗിച്ച് രാജയെ കൊലപ്പെടുത്തി കൊക്കയിലേക്ക് തള്ളുകയായിരുന്നു. കേസിലെ മറ്റ് പ്രതികളായ രാജ് കുശ്വാഹയും ക്വട്ടേഷൻ സംഘാംഗങ്ങളും ഇപ്പോഴും ജുഡീഷ്യൽ കസ്റ്റഡിയിലാണ്.
Summary: Sonam Raghuvanshi, accused of killing her husband Raja Raghuvanshi during their 2025 honeymoon in Meghalaya, was granted bail due to a “clerical error” by the police. The arrest documents cited a non-existent Section 403 (1) of the BNS instead of the murder charge under Section 103 (1). The court noted that failing to inform the accused of the correct grounds of arrest is a violation of fundamental rights. Sonam was granted bail with conditions, including a ₹50,000 bond, while her accomplices remain in custody.
