മുതിര്‍ന്ന ടിഡിപി നേതാവും വ്യവസായ പ്രമുഖനുമായ അലി മസ്ക്കത്തി കോൺഗ്രസിൽ ചേർന്നു
ഹൈദരാബാദ്: മുതിര്‍ന്ന ടിഡിപി നേതാവും വ്യവസായപ്രമുഖനുമായ അലി ബിന്‍ ഇബ്രാഹിം മസ്‌കത്തി കോണ്‍ഗ്രസില്‍ ചേര്‍ന്നു.
ഹൈദരാബാദില്‍ കോണ്‍ഗ്രസ് പ്രവര്‍ത്തക സമിതി യോഗം നടക്കുന്നതിനിടെയായിരുന്നു ഓള്‍ഡ് സിറ്റി സ്വദേശിയായ അലി മസ്‌കത്തി കോൺഗ്രസ്സിൽ പ്രവേശിച്ചത്. മസ്‌കത്തിയുടെ അനുയായികളും ചടങ്ങിനെത്തിയിരുന്നു. കോണ്‍ഗ്രസ് ദേശീയ അദ്ധ്യക്ഷന്‍ മല്ലികാര്‍ജുന്‍ ഖാര്‍ഗെ, തെലങ്കാന കോണ്‍ഗ്രസ് അദ്ധ്യക്ഷന്‍ എ രേവന്ത് റെഡ്ഡി, മുന്‍ മന്ത്രി ഷബീര്‍ അലി എന്നിവരുടെ സാന്നിദ്ധ്യത്തിലാണ് ഇദ്ദേഹം കോണ്‍ഗ്രസില്‍ ചേര്‍ന്നത്.
ഓള്‍ഡ് സിറ്റിയില്‍ ഏറെ സ്വാധീനമുള്ള മസ്‌കത്തി കുടുംബം ഏറെക്കാലമായി പ്രാദേശിക രാഷ്ട്രീയത്തില്‍ സജീവമാണ്. വരുന്ന നിയമസഭ തിരഞ്ഞെടുപ്പില്‍ അലി മസ്‌കത്തി കോണ്‍ഗ്രസ് സ്ഥാനാര്‍ത്ഥിയാകാനുള്ള സാധ്യതയും ഇതോടെ തെളിഞ്ഞിട്ടുണ്ട്. 2002ലാണ് അലി മസ്‌കത്തി ടിഡിപിയില്‍ ചേര്‍ന്നത്. എംഎല്‍എസിയായി തിരഞ്ഞെടുക്കപ്പെട്ടിരുന്നു. ഉര്‍ദു അക്കാദമി ചെയര്‍മാനായും പ്രവര്‍ത്തിച്ചിരുന്നു.