ഇംഫാൽ: മണിപ്പൂരിലെ മെയ്തെയ്, കുകി വിഭാഗങ്ങൾ തമ്മിൽ ഐക്യത്തോടെ മുന്നോട്ടുപോകണമെന്ന് രാഷ്ട്രപതി ദ്രൗപതി മുർമു ആവശ്യപ്പെട്ടു. മണിപ്പൂരിലെ ജനങ്ങളുടെ ആശങ്ക പരിഹരിക്കുന്നതിനാണ് കേന്ദ്ര-സംസ്ഥാന സർക്കാരുകൾ മുൻഗണന നൽകുന്നതെന്നും രാഷ്ട്രപതി വ്യക്തമാക്കി. രണ്ടുദിവസത്തെ സന്ദർശനത്തിനായി മണിപ്പൂരിലെത്തിയ രാഷ്ട്രപതി, വംശീയ കലാപത്തിൽ വീട് നഷ്ടപ്പെട്ട ദുരിതബാധിതരുമായി കൂടിക്കാഴ്ച നടത്തി.(Meitei - Kuki communities should move together, President in Manipur)
അക്രമത്തെത്തുടർന്ന് മണിപ്പൂരിലെ ജനങ്ങൾ അനുഭവിച്ച വേദനയെക്കുറിച്ച് തനിക്ക് അറിയാമെന്നും അവരുടെ ആശങ്കകൾ പരിഗണിക്കുന്നതിനാണ് പരമമായ മുൻഗണനയെന്നും രാഷ്ട്രപതി പറഞ്ഞു. സർക്കാർ എപ്പോഴും മണിപ്പൂരിലെ ദുരിതബാധിതർക്കൊപ്പമാണ്. വീടുകളും ഉപജീവനമാർഗവും സുരക്ഷിതമാക്കാൻ സർക്കാർ പ്രവർത്തിക്കുന്നുണ്ട്. മണിപ്പൂരിനെ സമൃദ്ധിയുടെയും സന്തോഷത്തിന്റെയും ഉന്നതികളിൽ എത്തിക്കുമെന്നും രാഷ്ട്രപതി കൂട്ടിച്ചേർത്തു.
ഇംഫാലിലെ സിറ്റി കൺവെൻഷൻ സെന്ററിൽ നടന്ന സ്വീകരണ പരിപാടിയിൽ രാഷ്ട്രപതി പങ്കെടുത്തു. കൂടാതെ, സേനാപതി ജില്ല സന്ദർശിക്കുകയും വിവിധ വികസന പദ്ധതികൾ ഉദ്ഘാടനം ചെയ്യുകയും ചെയ്തു.