ന്യൂഡൽഹി: ദേശീയ പരീക്ഷാ ഏജൻസി (NTA) നടത്തുന്ന നീറ്റ് യുജി 2026 പുനഃപരീക്ഷ ഇന്ന് നടക്കുന്നു. പരീക്ഷാ കേന്ദ്രങ്ങളിൽ 11 മണി മുതൽ പ്രവേശനം ആരംഭിച്ചു. നേരത്തെ റദ്ദാക്കിയ മെയ് 3-ലെ പരീക്ഷയ്ക്ക് പകരം നടക്കുന്ന റീ-ടെസ്റ്റിൽ രാജ്യത്താകമാനം 20 ലക്ഷത്തിലധികം വിദ്യാർത്ഥികൾ പങ്കെടുക്കും. ഉച്ചയ്ക്ക് 2:00 മുതൽ വൈകിട്ട് 5:15 വരെയാണ് പരീക്ഷാ സമയം.(NEET UG 2026 Re-Exam Conducted Under Tight Security Today)
അതിസുരക്ഷാ ക്രമീകരണങ്ങളാണ് പരീക്ഷാ കേന്ദ്രങ്ങളിൽ ഏർപ്പെടുത്തിയിരിക്കുന്നത്. ബയോമെട്രിക് പരിശോധന, കർശനമായ ഫ്രസ്കിംഗ്, കൂടുതൽ നിരീക്ഷണം എന്നിവയിലൂടെ പരീക്ഷയുടെ സുതാര്യത ഉറപ്പാക്കാനാണ് എൻടിഎയുടെ തീരുമാനം. ഉച്ചയ്ക്ക് 1:30-ന് മുൻപായി വിദ്യാർത്ഥികൾ പരീക്ഷാ കേന്ദ്രങ്ങളിൽ റിപ്പോർട്ട് ചെയ്യണം. 1:30-ന് ശേഷം പ്രവേശനം അനുവദിക്കില്ല. അഡ്മിറ്റ് കാർഡ്, അംഗീകൃത ഫോട്ടോ ഐഡി കാർഡ്, പാസ്പോർട്ട് സൈസ് ഫോട്ടോ എന്നിവ കൈവശം കരുതണം.
സുഗമമായ പ്രവേശനത്തിനായി എൻടിഎ നിഷ്കർഷിച്ച ഡ്രസ് കോഡ് വിദ്യാർത്ഥികൾ നിർബന്ധമായും പാലിക്കണം. ഇളം നിറത്തിലുള്ള പകുതി കൈയുള്ള വസ്ത്രങ്ങളും ഹീൽ കുറഞ്ഞ ചെരിപ്പുകളും മാത്രമേ അനുവദിക്കൂ. ഫുൾ സ്ലീവ് വസ്ത്രങ്ങൾ, ഷൂസ്, വലിയ ബട്ടണുകൾ, ആഭരണങ്ങൾ തുടങ്ങിയവ ഒഴിവാക്കണം. ഇലക്ട്രോണിക് ഉപകരണങ്ങൾക്കോ പഠന സാമഗ്രികൾക്കോ പ്രവേശനമില്ല. രാജ്യത്തുടനീളമുള്ള കേന്ദ്രങ്ങളിൽ അതീവ സുരക്ഷയിലാണ് പരീക്ഷ നടക്കുന്നത്. ജമ്മു കശ്മീർ അടക്കമുള്ള സ്ഥലങ്ങളിൽ കർശനമായ നിരീക്ഷണത്തിലാണ് പരീക്ഷാ നടപടികൾ പുരോഗമിക്കുന്നത്. വിദ്യാർത്ഥികൾക്ക് അഡ്മിറ്റ് കാർഡ് ഔദ്യോഗിക വെബ്സൈറ്റ് വഴി ഡൗൺലോഡ് ചെയ്യാം.
Story Summary
The National Testing Agency (NTA) is conducting the NEET UG 2026 re-exam today, June 21, 2026, across India and abroad for over 20 lakh students. The exam, held under enhanced security measures and biometric authentication, will take place from 2:00 PM to 5:15 PM, with strict entry deadlines and a prescribed dress code to ensure a transparent and fair process.
