മേഘാലയ: ഹണിമൂൺ യാത്രയ്ക്കിടെ ഭർത്താവ് രാജ രഘുവംശിയെ കൊലപ്പെടുത്തിയ കേസിലെ പ്രതി സോനം രഘുവംശിക്ക് ലഭിച്ച ജാമ്യം റദ്ദാക്കണമെന്നാവശ്യപ്പെട്ട് മേഘാലയ സർക്കാർ നൽകിയ ഹർജി സുപ്രീം കോടതി തള്ളി. മേഘാലയ ഹൈക്കോടതി അനുവദിച്ച ജാമ്യത്തിൽ ഇടപെടാൻ കോടതി വിസമ്മതിച്ചു (Meghalaya Honeymoon Murder Case). സോനം ഇതിനകം ജയിൽ മോചിതയായ സാഹചര്യത്തിൽ ജാമ്യം റദ്ദാക്കുന്നത് ഉചിതമല്ലെന്ന് സുപ്രീം കോടതി നിരീക്ഷിച്ചു. കേസിന്റെ വിചാരണ പുരോഗതി നിരീക്ഷിക്കുമെന്നും കോടതി വ്യക്തമാക്കി. സോനം രഘുവംശിക്ക് സുപ്രീം കോടതി നോട്ടീസ് അയച്ചു.
കഴിഞ്ഞ വർഷം മെയ് മാസത്തിലാണ് മധ്യപ്രദേശ് സ്വദേശികളായ രാജ രഘുവംശിയും സോനം രഘുവംശിയും വിവാഹിതരായത്. മെയ് 20-ന് മേഘാലയയിലെ സോഹ്റയിലേക്ക് ഹണിമൂണിനായി പോയ ഇവർ പിന്നീട് കാണാതാവുകയായിരുന്നു. ജൂൺ 2-ന് രാജയുടെ മൃതദേഹം കണ്ടെത്തി. ജൂൺ 9-ന് ഉത്തർപ്രദേശിലെ ഗാസിപ്പൂരിൽ നിന്നാണ് സോനത്തെ അറസ്റ്റ് ചെയ്തത്. പിന്നീട് സോനത്തിന്റെ കാമുകൻ രാജ് സിംഗ് കുശ്വാഹയെയും പോലീസ് പിടികൂടി.
അറസ്റ്റ് സംബന്ധിച്ച രേഖകളിൽ കൊലപാതകക്കുറ്റത്തിന് അനുസൃതമായ വകുപ്പുകൾക്ക് പകരം തെറ്റായ വകുപ്പുകൾ രേഖപ്പെടുത്തിയതും, പോലീസ് ഉദ്യോഗസ്ഥരുടെ അനാസ്ഥയും ചൂണ്ടിക്കാട്ടിയാണ് സോനത്തിന് ട്രയൽ കോടതി ജാമ്യം നൽകിയത്. അറസ്റ്റ് മെമ്മോ ഉൾപ്പെടെയുള്ള രേഖകളിൽ വരുത്തിയ പിഴവുകൾ വെറും അക്ഷരത്തെറ്റായി കാണാനാവില്ലെന്ന് ചൂണ്ടിക്കാട്ടി മേഘാലയ ഹൈക്കോടതിയും ജാമ്യം ശരിവെച്ചു. ഒരു പ്രതിയെ അറസ്റ്റ് ചെയ്യുമ്പോൾ പാലിക്കേണ്ട സുപ്രധാന നിയമനടപടികൾ അധികൃതർ അശ്രദ്ധമായാണ് കൈകാര്യം ചെയ്തതെന്ന് കോടതി വിമർശിച്ചിരുന്നു. കേസിൽ ജൂലൈ 9-ന് സുപ്രീം കോടതി വീണ്ടും വാദം കേൾക്കും.
Summary: The Supreme Court of India has refused to stay the bail granted to Sonam Raghuvanshi, who is accused of murdering her husband, Raja Raghuvanshi, during their honeymoon in Meghalaya last year. The Court observed that since the accused had already been released from jail, a stay was not warranted at this stage, though it agreed to monitor the ongoing trial and issued a notice to the accused.
