ക്രിക്കറ്റ് ലോകത്തെ കരുത്തരായ മുംബൈ ഇന്ത്യൻസിന്റെ നിറങ്ങളും ലോഗോയും പതിപ്പിച്ച സവിശേഷ വിമാനം അവതരിപ്പിച്ച് മലേഷ്യ എയർലൈൻസ് (Mumbai Indians, Malaysia Airlines). തങ്ങളുടെ എ330-300 (A330-300) വിമാനത്തിലാണ് മുംബൈ ഇന്ത്യൻസിന്റെ സ്വത്വം പ്രതിഫലിപ്പിക്കുന്ന ഡിസൈൻ വിമാനക്കമ്പനി ഒരുക്കിയിരിക്കുന്നത്. കായികരംഗത്തെയും ആഗോള കണക്റ്റിവിറ്റിയെയും ഒരുപോലെ ആഘോഷിക്കുകയാണ് ഈ പുതിയ ചുവടുവെപ്പിലൂടെ ലക്ഷ്യമിടുന്നത്.
ഡിസൈനിലെ സവിശേഷതകൾ
മുംബൈ ഇന്ത്യൻസിന്റെ ഐക്കണിക് നീലയും സ്വർണ്ണനിറവും ചേർന്ന ജേഴ്സി മോഡലിലാണ് വിമാനത്തിന്റെ പുറംഭാഗം അലങ്കരിച്ചിരിക്കുന്നത്. ടീമിന്റെ വർദ്ധിച്ചുവരുന്ന ആഗോള ആരാധകവൃന്ദത്തെയും, വിവിധ രാജ്യങ്ങളെയും സംസ്കാരങ്ങളെയും തമ്മിൽ ബന്ധിപ്പിക്കുന്ന മലേഷ്യ എയർലൈൻസിന്റെ ദൗത്യത്തെയും ഒരുപോലെ അടയാളപ്പെടുത്തുന്നതാണ് ഈ പുതിയ രൂപകൽപ്പന.
ഡിജിറ്റൽ ക്യാമ്പയിൻ
വിമാനം അവതരിപ്പിച്ചതിനൊപ്പം മുംബൈയുടെ തനതായ സംസ്കാരവും വികാരവും ഉൾക്കൊള്ളുന്ന ഒരു ഹ്രസ്വ ഡിജിറ്റൽ ചിത്രവും ഇരു കൂട്ടരും ചേർന്ന് പുറത്തിറക്കി. സ്റ്റേഡിയത്തിന്റെ അതിർവരമ്പുകൾക്കപ്പുറം ലോകത്തിന്റെ വിവിധ ഭാഗങ്ങളിലേക്ക് മുംബൈ ഇന്ത്യൻസിന്റെ ഖ്യാതി എത്തിക്കാൻ ഈ വിമാനത്തിന് സാധിക്കുമെന്ന് കമ്പനി അറിയിച്ചു. ഈ വർഷം തന്നെ പ്രധാന രാജ്യാന്തര റൂട്ടുകളിൽ ഈ ‘മുംബൈ ഇന്ത്യൻസ് വിമാനം’ പറന്നു തുടങ്ങും.
യാത്രക്കാർക്ക് ഒരു കായികാനുഭവം കൂടി സമ്മാനിക്കുന്ന രീതിയിലാകും വിമാനത്തിന്റെ ഉൾവശവും സേവനങ്ങളും ക്രമീകരിക്കുകയെന്നാണ് സൂചന.
Story Summary: Malaysia Airlines has unveiled a special Mumbai Indians-themed livery on its A330-300 aircraft. This unique collaboration celebrates sports and global connectivity, taking the iconic identity of the Mumbai Indians franchise to international skies across major routes this year.
