ചെന്നൈ: തമിഴ്നാട് നിയമസഭയിലേക്കുള്ള 234 മണ്ഡലങ്ങളിലും വോട്ടെടുപ്പ് പുരോഗമിക്കുമ്പോൾ സംസ്ഥാനത്ത് ഉച്ചയ്ക്ക് മൂന്ന് മണി വരെ 70 ശതമാനം പോളിംഗ് രേഖപ്പെടുത്തി (Tamil Nadu Election 2026). ഉച്ചയ്ക്ക് ഒരു മണി വരെ 56.81 ശതമാനമായിരുന്നു പോളിംഗ് നിരക്ക്. മികച്ച പോളിംഗ് തുടരുന്നതിനിടെ പലയിടങ്ങളിലും രാഷ്ട്രീയ സംഘർഷങ്ങളും റിപ്പോർട്ട് ചെയ്തിട്ടുണ്ട്.
ഉച്ചയ്ക്ക് ഒരു മണി വരെയുള്ള കണക്കനുസരിച്ച് തിരുപ്പൂർ ജില്ലയിലാണ് ഏറ്റവും കൂടുതൽ പോളിംഗ് (62.97%) രേഖപ്പെടുത്തിയത്. ചെന്നൈയിൽ 54.58 ശതമാനവും മധുരയിൽ 54.75 ശതമാനവും പോളിംഗ് നടന്നു. കോയമ്പത്തൂർ 58.24 ശതമാനവും തിരുച്ചിറപ്പള്ളി 57.66 ശതമാനവുമാണ് രേഖപ്പെടുത്തിയത്. മുഖ്യമന്ത്രി എം.കെ. സ്റ്റാലിൻ മത്സരിക്കുന്ന കൊളത്തൂർ മണ്ഡലത്തിൽ ഒരു മണി വരെ 56.59 ശതമാനം പോളിംഗ് രേഖപ്പെടുത്തി. ഉപമുഖ്യമന്ത്രി ഉദയനിധി സ്റ്റാലിൻ മത്സരിക്കുന്ന ചേപ്പാട്-തിരുവള്ളിക്കേണിയിൽ 53.55 ശതമാനവും എടപ്പാടി പളനിസ്വാമിയുടെ എടപ്പാടി മണ്ഡലത്തിൽ 60.98 ശതമാനവും പോളിംഗ് നടന്നു.
തമിഴക വെട്രി കഴകം (ടിവികെ) അധ്യക്ഷൻ വിജയ് ആദ്യമായി തിരഞ്ഞെടുപ്പിൽ മത്സരിക്കുന്ന തിരുച്ചിറപ്പള്ളി ഈസ്റ്റിൽ 55.95 ശതമാനമാണ് ഒരു മണി വരെയുള്ള പോളിംഗ് നിരക്ക്. കോയമ്പത്തൂരിലെ ഗാന്ധിമാനഗറിൽ ഡിഎംകെ, ബിജെപി പ്രവർത്തകർ തമ്മിൽ ശക്തമായ സംഘർഷമുണ്ടായി. ബിജെപി ജില്ലാ പ്രസിഡന്റ് രമേശ് കുമാറിന്റെ വാഹനം ഡിഎംകെ പ്രവർത്തകർ തടഞ്ഞതാണ് സംഘർഷത്തിന് കാരണമായത്. പ്രദേശത്തെ ഹോട്ടലുകളിൽ ഡിഎംകെ പ്രവർത്തകർ മദ്യം കഴിക്കുന്നുണ്ടെന്നും പോലീസ് അവരെ സഹായിക്കുന്നുണ്ടെന്നും ബിജെപി ആരോപിച്ചു.
സംസ്ഥാനത്ത് വോട്ടെടുപ്പ് സമയം വൈകുന്നേരം എട്ട് മണി വരെ നീട്ടണമെന്ന് ടിവികെ നേതാവ് വിജയ് തിരഞ്ഞെടുപ്പ് കമ്മീഷനോട് ആവശ്യപ്പെട്ടു. വോട്ടെടുപ്പ് മന്ദഗതിയിലാണ് നടക്കുന്നതെന്നും പലയിടങ്ങളിലും നീണ്ട നിരയാണെന്നും അദ്ദേഹം കത്തിൽ ചൂണ്ടിക്കാട്ടി. വോട്ടർമാർക്കായി കൂടുതൽ ഗതാഗത സൗകര്യങ്ങൾ ഏർപ്പെടുത്തണമെന്നും അദ്ദേഹം ആവശ്യപ്പെട്ടു. സംസ്ഥാന ഭരണകൂടവും ഗതാഗത വകുപ്പും ചേർന്ന് ബോധപൂർവ്വം ബസ് സർവീസുകൾ കുറച്ചുകൊണ്ട് വോട്ടർമാരെ തടയാൻ ശ്രമിക്കുകയാണെന്ന് ടിവികെ നേതാക്കളായ ‘ബുസി’ ആനന്ദും ആദവ് അർജുനയും ആരോപിച്ചു.
Summary: Tamil Nadu recorded a significant voter turnout of 70% by 3 PM in the 2026 Assembly elections. Key leaders including CM M.K. Stalin, Udhayanidhi Stalin, and EPS saw steady voting in their respective strongholds. Actor-politician Vijay, contesting from Tiruchirappalli East, requested the Election Commission to extend polling hours until 8 PM due to slow voting processes and long queues. Meanwhile, clashes erupted between DMK and BJP workers in Coimbatore’s Gandhimanagar after BJP district president Ramesh Kumar’s vehicle was intercepted. TVK leaders also accused the state administration of intentionally disrupting public transport services to hinder voters.
