കൊൽക്കത്ത: പശ്ചിമ ബംഗാൾ നിയമസഭാ തിരഞ്ഞെടുപ്പിൽ പരാജയപ്പെട്ടിട്ടും മുഖ്യമന്ത്രി സ്ഥാനം രാജിവെക്കാൻ വിസമ്മതിക്കുന്ന മമത ബാനർജിക്കെതിരെ രൂക്ഷവിമർശനവുമായി സുപ്രീം കോടതിയിലെ മുതിർന്ന അഭിഭാഷകൻ മഹേഷ് ജെഠ്മലാനി. തിരഞ്ഞെടുപ്പ് ഫലം കമ്മീഷൻ ഔദ്യോഗികമായി പ്രഖ്യാപിച്ചുകഴിഞ്ഞാൽ മമത മുഖ്യമന്ത്രിയല്ലെന്നും, നിലവിൽ അവർ മുഖ്യമന്ത്രിയുടെ ഓഫീസിൽ അതിക്രമിച്ചു കയറിയ ആളാണെന്നും ജെഠ്മലാനി എൻഡിടിവിക്ക് നൽകിയ അഭിമുഖത്തിൽ പറഞ്ഞു. (Mahesh Jethmalani on Mamata Banerjee resignation)
തിരഞ്ഞെടുപ്പ് ഫലം അംഗീകരിക്കാതെ ഓഫീസിൽ തുടരുന്നത് ജനാധിപത്യ സംവിധാനത്തോടുള്ള വെല്ലുവിളിയാണ്. മമത സ്വയം രാജിവെക്കുന്നില്ലെങ്കിൽ ഗവർണർ അവരെ ഔദ്യോഗികമായി പുറത്താക്കണമെന്നും, ആവശ്യമെങ്കിൽ പോലീസിനെ ഉപയോഗിച്ച് അവരെ ഓഫീസിൽ നിന്ന് ഒഴിപ്പിക്കണമെന്നും അദ്ദേഹം ആവശ്യപ്പെട്ടു. 100 സീറ്റുകൾ ബിജെപി മോഷ്ടിച്ചുവെന്ന മമതയുടെ ആരോപണത്തിന്, തെളിവുണ്ടെങ്കിൽ കോടതിയെ സമീപിക്കാനാണ് ജെഠ്മലാനി മറുപടി നൽകിയത്.
താൻ തോറ്റിട്ടില്ലെന്നും അതുകൊണ്ട് രാജിവെക്കില്ലെന്നുമാണ് മമതയുടെ നിലപാട്. ഭവാനിപൂർ മണ്ഡലത്തിൽ പരാജയപ്പെട്ട മമത, തിരഞ്ഞെടുപ്പ് അട്ടിമറിക്കപ്പെട്ടുവെന്ന് ആരോപിക്കുന്നു. അസം മുഖ്യമന്ത്രി ഹിമന്ത ബിശ്വ ശർമ്മയും മമതയെ പുറത്താക്കണമെന്ന് ആവശ്യപ്പെട്ടു. രാജ്യം മമതയുടെ ഇഷ്ടത്തിനല്ല ഓടുന്നതെന്നും ഗവർണർ അവരെ ഡിസ്മിസ് ചെയ്യുമെന്നും അദ്ദേഹം പറഞ്ഞു. നിലവിലെ ബംഗാൾ നിയമസഭയുടെ കാലാവധി മെയ് 7-ന് അവസാനിക്കും. അതിനുള്ളിൽ മമത രാജിവെച്ചില്ലെങ്കിൽ ഗവർണർക്ക് കടുത്ത നടപടികളിലേക്ക് നീങ്ങേണ്ടി വരും.
തമിഴ്നാട്ടിൽ വിജയ് ഭൂരിപക്ഷം തെളിയിക്കാനുള്ള നീക്കങ്ങൾ നടത്തുമ്പോൾ, ബംഗാളിൽ അധികാരം വിട്ടൊഴിയാൻ മമത തയ്യാറാകാത്തത് ഇന്ത്യയിലെ മറ്റ് സംസ്ഥാനങ്ങളിലെ തിരഞ്ഞെടുപ്പ് വിജയങ്ങളെപ്പോലും നിഴലിലാക്കുന്ന വലിയ രാഷ്ട്രീയ ചർച്ചയായി മാറിയിരിക്കുകയാണ്.
Summary: Senior advocate Mahesh Jethmalani has called for the dismissal of Mamata Banerjee as West Bengal CM after she refused to resign following the TMC’s defeat. Jethmalani termed her a “trespasser” in the CM’s office and suggested the Governor use police force if necessary to evict her. While Mamata claims 100 seats were “stolen,” leaders like Himanta Biswa Sarma have also demanded her immediate dismissal as the state’s assembly term ends on May 7.
