ചെന്നൈ: തമിഴ്നാട്ടിലെ തിരുച്ചി ഈസ്റ്റ്, പെരുന്തുറൈ, അംബാസമുദ്രം, വിരാലിമലൈ, കരൂർ എന്നീ അഞ്ച് നിയമസഭാ മണ്ഡലങ്ങളിൽ ഉപതെരഞ്ഞെടുപ്പ് വിജ്ഞാപനം പുറപ്പെടുവിക്കുന്നത് മദ്രാസ് ഹൈക്കോടതി വിലക്കി (Tamil nadu by election). ഈ മണ്ഡലങ്ങളിലെ പൊതുതെരഞ്ഞെടുപ്പ് ഫലങ്ങളെ ചോദ്യം ചെയ്തുകൊണ്ടുള്ള ഹർജികൾ നിലവിൽ കോടതിയുടെ പരിഗണനയിലിരിക്കുന്ന സാഹചര്യത്തിലാണ് കേന്ദ്ര തെരഞ്ഞെടുപ്പ് കമ്മീഷന് കോടതി ഇടക്കാല വിലക്കേർപ്പെടുത്തിയത്. ജൂലൈ 31 വരെയാണ് ഈ സ്റ്റേ നിലനിൽക്കുക.
ജനപ്രതിനിധികൾ രാജിവെച്ചതിനെ തുടർന്ന് ഒഴിവുവന്ന സീറ്റുകളിൽ, നിലവിലുള്ള തെരഞ്ഞെടുപ്പ് ഹർജികൾ തീർപ്പാക്കുന്നതിന് മുൻപ് ഉപതെരഞ്ഞെടുപ്പ് നടത്തുന്നത് വലിയ നിയമക്കുഴപ്പങ്ങൾക്ക് വഴിമാറുമെന്ന് ചൂണ്ടിക്കാട്ടി സമർപ്പിക്കപ്പെട്ട പൊതുതാൽപ്പര്യ ഹർജിയിലാണ് കോടതിയുടെ ഈ അടിയന്തര നടപടി. കോടതിയിൽ കേസുകൾ നിലനിൽക്കെ പുതിയ തെരഞ്ഞെടുപ്പ് നടത്തിയാൽ ഒരു മണ്ഡലത്തെ പ്രതിനിധീകരിച്ച് ഒരേസമയം രണ്ട് ജനപ്രതിനിധികൾ വരുന്നതടക്കമുള്ള അസ്വാഭാവിക സാഹചര്യങ്ങൾ ഉണ്ടായേക്കാമെന്ന് ഹർജിക്കാരൻ വാദിച്ചു. ഇതിനായി മുൻകാല സുപ്രീംകോടതി വിധികളും കോടതിയിൽ ചൂണ്ടിക്കാണിക്കപ്പെട്ടു.
തമിഴ്നാട് മുഖ്യമന്ത്രി സി. ജോസഫ് വിജയ് മത്സരിച്ച് വിജയിച്ച ശേഷം രാജിവെച്ച തിരുച്ചി ഈസ്റ്റ് മണ്ഡലവും ഈ വിലക്കിന്റെ പരിധിയിൽ വരുന്നുണ്ട്. നിയമസഭാ തെരഞ്ഞെടുപ്പിൽ പെരമ്പൂർ, തിരുച്ചി ഈസ്റ്റ് എന്നീ രണ്ട് മണ്ഡലങ്ങളിൽ നിന്ന് മത്സരിച്ച് ജയിച്ച വിജയ് പിന്നീട് തിരുച്ചി ഈസ്റ്റ് സീറ്റ് ഒഴിഞ്ഞിരുന്നു. എന്നാൽ ഈ മണ്ഡലത്തിലെ വിജയ്യുടെ വിജയത്തെ ചോദ്യം ചെയ്ത് എതിർ സ്ഥാനാർത്ഥി എസ്. ഇനിഗോ ഇരുദയരാജ് കോടതിയെ സമീപിച്ചിട്ടുണ്ട്. ജനപ്രതിനിധികൾ രാജിവെച്ച തീയതിയും അവർക്കെതിരെയുള്ള ഹർജികൾ ഫയൽ ചെയ്ത തീയതിയും തമ്മിലുള്ള വ്യത്യാസങ്ങൾ വിശദമായി പരിശോധിക്കേണ്ടതുണ്ടെന്ന് കോടതി നിരീക്ഷിച്ചു. കേസിൽ മറുപടി സത്യവാങ്മൂലം സമർപ്പിക്കാൻ തെരഞ്ഞെടുപ്പ് കമ്മീഷൻ ഉൾപ്പെടെയുള്ള എതിർകക്ഷികൾക്ക് ജൂലൈ 31 വരെ കോടതി സമയം അനുവദിച്ചിട്ടുണ്ട്.
Story Summary: The Madras High Court has barred the Election Commission from notifying by-elections in five Tamil Nadu assembly constituencies, including Tiruchi East, which was vacated by CM C. Joseph Vijay. The interim stay is effective until July 31, as election petitions challenging the previous results are still pending in court.
