ന്യൂഡൽഹി: വനിതാ സംവരണത്തിനൊപ്പം ലോക്സഭയിലെയും നിയമസഭകളിലെയും സീറ്റുകൾ വർദ്ധിപ്പിക്കാൻ ലക്ഷ്യമിട്ടുള്ള 131-ാം ഭരണഘടനാ ഭേദഗതി ബില്ലിന് ലോക്സഭയിൽ അവതരണാനുമതി ലഭിച്ചു (Lok Sabha Delimitation 2026). ബിൽ അവതരിപ്പിക്കാനുള്ള അനുമതി തേടിയുള്ള വോട്ടെടുപ്പിൽ 207 എംപിമാർ അനുകൂലിച്ചപ്പോൾ 126 പേർ എതിർത്തു. സഭയിലുണ്ടായിരുന്ന 333 എംപിമാരിൽ ഭൂരിഭാഗം പേരും കേന്ദ്ര നീക്കത്തെ പിന്തുണച്ചു.
ലോക്സഭയുടെ ഘടനയിൽ വിപ്ലവകരമായ മാറ്റങ്ങളാണ് ബില്ലിലൂടെ കേന്ദ്രം മുന്നോട്ട് വെക്കുന്നത്. നിലവിലെ 543 ലോക്സഭാ സീറ്റുകൾ 850 ആയി ഉയർത്താനാണ് ശുപാർശ. ഇതിൽ 815 അംഗങ്ങൾ പ്രാദേശിക നിയോജകമണ്ഡലങ്ങളിൽ നിന്നും 35 അംഗങ്ങൾ കേന്ദ്രഭരണ പ്രദേശങ്ങളിൽ നിന്നും തിരഞ്ഞെടുക്കപ്പെടും. (നിലവിൽ കേന്ദ്രഭരണ പ്രദേശങ്ങളിൽ നിന്ന് 19 എംപിമാരാണുള്ളത്).
2026-ന് ശേഷമുള്ള ആദ്യ സെൻസസ് കണക്കുകൾ വന്നതിന് ശേഷം മാത്രമേ അടുത്ത മണ്ഡല പുനർനിർണ്ണയം പാടുള്ളൂ എന്ന നിലവിലെ ഭരണഘടനാ വ്യവസ്ഥ ബില്ലിലൂടെ നീക്കം ചെയ്യും. 2011-ലെ സെൻസസ് കണക്കുകൾ ഉപയോഗിച്ച് തന്നെ പുനർനിർണ്ണയം നടത്താൻ സാധിക്കുന്ന തരത്തിൽ ‘ജനസംഖ്യ’ എന്ന നിർവചനത്തിലും ഭേദഗതി വരുത്തിയിട്ടുണ്ട്.
ഫെഡറലിസത്തെ തകർക്കാനുള്ള നീക്കമാണിതെന്ന് ആരോപിച്ച് പ്രതിപക്ഷം സഭയിൽ ഒറ്റക്കെട്ടായി രംഗത്തെത്തി. വനിതാ സംവരണത്തോടൊപ്പം മണ്ഡല പുനർനിർണ്ണയം കൊണ്ടുവരുന്നത് സംശയാസ്പദമാണെന്നും ഇത് സാമൂഹ്യനീതിക്കും ഫെഡറലിസത്തിനും എതിരാണെന്നും കെ. രാധാകൃഷ്ണൻ എംപി പറഞ്ഞു.
ഭരണഘടനയെ അട്ടിമറിക്കാനുള്ള ശ്രമമാണ് കേന്ദ്രം നടത്തുന്നതെന്നും ബില്ലിന് പിന്നിലെ ലക്ഷ്യം രാജ്യത്തിന് അറിയാമെന്നും കെ.സി. വേണുഗോപാൽ എംപി പ്രതികരിച്ചു. എഐഎംഐഎം: കേന്ദ്രസർക്കാർ ഫെഡറലിസത്തിന് നേരെ ആക്രമണം നടത്തുകയാണെന്ന് അസദുദ്ദീൻ ഒവൈസി ആരോപിച്ചു.
Story Summary: The Lok Sabha approved the introduction of the 131st Constitutional Amendment Bill, which aims to increase Lok Sabha seats to 850 using 2011 census data. Opposition parties, including Congress and CPIM, strongly opposed the bill, terming it an attack on federalism and the Constitution.
