ന്യൂഡൽഹി: ഇന്ത്യൻ റെയിൽവേയിലെ യാത്രക്കാരുടെ പൗരബോധമില്ലായ്മയ്ക്കും ശുചിത്വമില്ലായ്മയ്ക്കുമെതിരെ ശക്തമായ പ്രതികരണവുമായി കേന്ദ്ര പാർലമെന്ററി കാര്യ മന്ത്രി കിരൺ റിജിജു (Kiren Rijiju on Train Cleanliness). മണാലിയിലേക്ക് പോകുന്ന ഒരു ട്രെയിൻ കോച്ചിലെ ദയനീയമായ അവസ്ഥയും മിസോറാമിലെ ട്രെയിനുകളിലെ മാതൃകാപരമായ ശുചിത്വവും തമ്മിൽ താരതമ്യം ചെയ്യുന്ന ഒരു വീഡിയോ പങ്കുവെച്ചുകൊണ്ടാണ് മന്ത്രി യാത്രികരെ വിമർശിച്ചത്. ‘മിസോറാമിൽ നിന്നും നമ്മുടെ വടക്കുകിഴക്കൻ സംസ്ഥാനങ്ങളിൽ നിന്നും പൗരബോധം പഠിക്കൂ’ എന്ന അടിക്കുറിപ്പോടെയാണ് അദ്ദേഹം ഈ വീഡിയോ തന്റെ ഔദ്യോഗിക സോഷ്യൽ മീഡിയ അക്കൗണ്ടിൽ റീപോസ്റ്റ് ചെയ്തത്.
Learn from Mizoram, our North East !
जिस किसी ने भी यह वीडियो बनाया है, मैं उससे सहमत हूँ। pic.twitter.com/bBTwyGZAqa— Kiren Rijiju (@KirenRijiju) June 3, 2026
‘ദി ബെറ്റർ ഇന്ത്യ’ ആദ്യം പുറത്തുവിട്ട ഈ വീഡിയോയിൽ, പത്താം ക്ലാസ് വിദ്യാർത്ഥികൾ യാത്ര ചെയ്ത ഒരു ട്രെയിൻ കോച്ചിൽ പുതപ്പുകളും ബെഡ് ഷീറ്റുകളും തറയിൽ അലക്ഷ്യമായി ഇട്ടിരിക്കുന്നതും ഭക്ഷണാവശിഷ്ടങ്ങളും പ്ലാസ്റ്റിക് കവറുകളും ബോഗിയിലുടനീളം ചിതറിക്കിടക്കുന്നതുമായ മോശം കാഴ്ചയാണ് ആദ്യമുള്ളത്. എന്നാൽ ഇതിന് നേർവിപരീതമായി, മിസോറാമിലെ ട്രെയിനുകളിൽ ഓരോ ബർത്തിനടുത്തും പ്രത്യേകം പോളിബാഗുകൾ സ്ഥാപിച്ച് യാത്രികർ അതിലേക്ക് കൃത്യമായി മാലിന്യങ്ങൾ നിക്ഷേപിക്കുന്ന മനോഹരമായ കാഴ്ചയും വീഡിയോയിൽ കാണാം. മിസോ സമൂഹത്തിൽ ആഴത്തിൽ വേരോടിയ ‘ത്ലാംഗ്നൈഹ്ന’ എന്ന ധാർമ്മിക മൂല്യമാണ് ഈ വ്യത്യാസത്തിന് കാരണമെന്നും, പൊതുശുചിത്വം സമൂഹത്തിന്റെ കൂട്ടായ കടമയാണെന്ന് ഈ തത്വം ജനങ്ങളെ പഠിപ്പിക്കുന്നുണ്ടെന്നും മന്ത്രി ചൂണ്ടിക്കാട്ടി. സ്കൂളുകളിൽ കിന്റർഗാർട്ടൻ തലം മുതൽ തന്നെ പൗരബോധ വിദ്യാഭ്യാസം നിർബന്ധമാക്കണമെന്നതുൾപ്പെടെ വലിയ പ്രതികരണങ്ങളാണ് ഈ വീഡിയോയ്ക്ക് താഴെ പൊതുജനങ്ങളിൽ നിന്നും ഉയരുന്നത്.
Summary: Union Minister of Parliamentary Affairs Kiren Rijiju shared a viral video highlighting the lack of civic sense among train passengers in India. The video compares a messy train coach used by students traveling to Manali with the exemplary cleanliness maintained in Mizoram’s trains. Highlighting the Mizo cultural value of ‘Tlangchawmnat’, which emphasizes community responsibility and cleanliness, the minister urged citizens to learn public etiquette from Northeast India.
