ബംഗളൂരു: വർദ്ധിച്ചുവരുന്ന ബലാത്സംഗം ഉൾപ്പെടെയുള്ള ക്രൂരമായ കുറ്റകൃത്യങ്ങൾ തടയാൻ പ്രതികളുടെ കയ്യോ കാലോ വെട്ടിമാറ്റുന്ന രീതിയിലുള്ള കഠിനമായ ശിക്ഷാ നിയമങ്ങൾ വേണമെന്ന കർണാടക ഹൈക്കോടതി (Karnataka High court rape case bail) ജഡ്ജിയുടെ വാക്കാലുള്ള പരാമർശം വലിയ നിയമ-രാഷ്ട്രീയ ചർച്ചകൾക്ക് വഴിതുറക്കുന്നു. ജസ്റ്റിസ് ആർ. നടരാജ് നടത്തിയ ഈ വിവാദ പരാമർശമാണ് ഇപ്പോൾ ഭരണഘടനാ ജനാധിപത്യ മൂല്യങ്ങളെ മുൻനിർത്തി വലിയ രീതിയിൽ വിലയിരുത്തപ്പെടുന്നത്. ബലാത്സംഗക്കേസിൽ പ്രതിയായ 23 കാരനായ എഞ്ചിനീയറിംഗ് വിദ്യാർത്ഥിയുടെ ജാമ്യാപേക്ഷ നിഷേധിച്ചുകൊണ്ട് കേസ് പരിഗണിക്കുന്നതിനിടയിലായിരുന്നു ജഡ്ജിയുടെ ഈ കടുത്ത പ്രതികരണം.
അടുത്തിടെയായി രാജ്യത്ത് അതീവ ലാഘവത്തോടെയും ആവർത്തിച്ചും ബലാത്സംഗം അടക്കമുള്ള മൃഗീയമായ കുറ്റകൃത്യങ്ങൾ ചെയ്യാനുള്ള പ്രവണത യുവാക്കൾക്കിടയിൽ വർദ്ധിച്ചുവരുന്നതായി കോടതി നിരീക്ഷിച്ചു. “കുറ്റവാളികളെയും ഇത്തരം സാമൂഹിക വിരുദ്ധരെയും കൃത്യമായ ഘട്ടത്തിൽ കർശനമായി കൈകാര്യം ചെയ്യാൻ മടിക്കുന്നതിനാൽ നിലവിലുള്ള നമ്മുടെ ക്രിമിനൽ നിയമങ്ങൾക്ക് ‘പല്ലുകൾ നഷ്ടപ്പെട്ടതായി’ തോന്നുന്നു. കാരണം നമ്മുടേത് ഒരു ജനാധിപത്യ രാജ്യമായതിനാൽ എല്ലാവരും അതിന്റെ ആനുകൂല്യം മുതലെടുക്കുകയാണ്. പ്രതികളുടെ ഒരു കയ്യോ കാലോ വെട്ടിമാറ്റാൻ കഴിഞ്ഞിരുന്നുവെങ്കിൽ, ഒരുപക്ഷേ ആളുകൾ നിയമം അനുസരിക്കാൻ തയ്യാറാകുമായിരുന്നു,”- ജസ്റ്റിസ് ആർ. നടരാജ് കോടതി മുറിയിൽ പറഞ്ഞു.
ചില പശ്ചിമേഷ്യൻ ഗൾഫ് രാജ്യങ്ങളിലെ കടുത്ത ഇസ്ലാമിക നിയമവ്യവസ്ഥകളെ അനുസ്മരിപ്പിക്കുന്ന രീതിയിലുള്ള ശിക്ഷകൾ നടപ്പിലാക്കിയാൽ മാത്രമേ, ആളുകൾക്ക് നിയമത്തോട് ബഹുമാനമുണ്ടാകൂ എന്നും കുറ്റകൃത്യങ്ങൾ ചെയ്യുന്നതിന് മുൻപ് രണ്ടുതവണ ചിന്തിക്കാൻ അവർ നിർബന്ധിതരാകൂ എന്നും ജഡ്ജി കൂട്ടിച്ചേർത്തു.
അതേസമയം, കുറ്റാരോപിതനായ വിദ്യാർത്ഥി താൻ ചെയ്യാത്ത കുറ്റത്തിന്റെ പേരിൽ കഴിഞ്ഞ ഏപ്രിൽ മാസം മുതൽ രണ്ട് മാസത്തോളമായി ജയിലിൽ കഴിയുകയാണെന്നും, മൂന്ന് വർഷത്തോളം പഴക്കമുള്ള സൌഹൃദത്തിന്റെ പശ്ചാത്തലത്തിലുള്ള ആരോപണമാണിതെന്നും പ്രതിഭാഗം അഭിഭാഷകൻ കോടതിയിൽ വാദിച്ചു. എന്നാൽ “ഉപ്പ് തിന്നവൻ വെള്ളം കുടിക്കും, പ്രതി കുറച്ചുദിവസം കൂടി ജയിലിൽ കിടന്ന് അവിടുത്തെ ജീവിതവുമായി പൊരുത്തപ്പെടട്ടെ” എന്നായിരുന്നു ജഡ്ജിയുടെ മറുപടി.
മുൻ സഹപാഠിയെ ഫ്ലാറ്റിലേക്ക് വിളിച്ചുവരുത്തി പീഡിപ്പിച്ചെന്ന പരാതിയിൽ നാഷണൽ കമ്മീഷൻ ഫോർ വുമൺ (NCW) ഇടപെട്ട ശേഷമാണ് വിദ്യാർത്ഥിക്കെതിരെ പോലീസ് കേസെടുത്തത്. ജാമ്യാപേക്ഷ തള്ളിയ കോടതി കേസിൽ സംസ്ഥാന സർക്കാരിന് നോട്ടീസ് അയക്കുകയും കൂടുതൽ വാദത്തിനായി ജൂൺ 8-ലേക്ക് മാറ്റിവെക്കുകയും ചെയ്തു. നിയമസംരക്ഷകർ തന്നെ പരസ്യമായി അംഗവിച്ഛേദ ശിക്ഷകളെ അനുകൂലിക്കുന്നത് ശരിയാണോ എന്ന ചോദ്യമാണ് ഇപ്പോൾ സോഷ്യൽ മീഡിയയിൽ ഉയരുന്നത്.
Story Summary: During a bail hearing for a 23-year-old engineering student accused of rape, Karnataka High Court Judge Justice R. Nataraj sparked controversy by stating that the “law has lost its teeth” and suggesting that chopping off a limb like in West Asian countries would deter crime.
