ന്യൂഡൽഹി: ഔദ്യോഗിക സന്ദർശനത്തിനായി ഇന്ത്യയിലെത്തിയ ജപ്പാൻ പ്രധാനമന്ത്രി സനായ് തക്കായ്ച്ചിക്ക് രാഷ്ട്രപതി ഭവനിൽ ഗാർഡ് ഓഫ് ഓണർ നൽകി സ്വീകരിച്ചു. പ്രധാനമന്ത്രി നരേന്ദ്ര മോദി നേരിട്ടെത്തിയാണ് ജാപ്പനീസ് പ്രധാനമന്ത്രിയെ സ്വാഗതം ചെയ്തത്. തക്കായ്ച്ചിയുടെ പ്രഥമ ഇന്ത്യാ സന്ദർശനമാണിത്.(Japanese Prime Minister Sanae Takaichi Receives Ceremonial Welcome In New Delhi)
മൂന്നുദിവസത്തെ സന്ദർശനത്തിന്റെ ഭാഗമായി ഇരുരാജ്യങ്ങളും തമ്മിലുള്ള ഉഭയകക്ഷി ചർച്ചകളും 16-ാമത് ഇന്ത്യ-ജപ്പാൻ വാർഷിക ഉച്ചകോടിയും നടക്കും. ഇന്ത്യയും ജപ്പാനും തമ്മിലുള്ള ‘സ്പെഷ്യൽ സ്ട്രാറ്റജിക് ആൻഡ് ഗ്ലോബൽ പാർട്ണർഷിപ്പ്’ കൂടുതൽ ശക്തിപ്പെടുത്തുകയാണ് സന്ദർശനത്തിന്റെ പ്രധാന ലക്ഷ്യം.
സാമ്പത്തിക സുരക്ഷ, പ്രതിരോധം, സമുദ്ര സുരക്ഷ, സെമികണ്ടക്ടർ സഹകരണം, ക്ലീൻ എനർജി, അത്യാധുനിക സാങ്കേതികവിദ്യകൾ തുടങ്ങിയ മേഖലകളിൽ സഹകരണം വ്യാപിപ്പിക്കുന്നതിനായിരിക്കും ഉച്ചകോടി ഊന്നൽ നൽകുക. കൂടാതെ, ഇന്തോ-പസഫിക് മേഖലയിലെ ഭൗമരാഷ്ട്രീയ സാഹചര്യങ്ങളും ചർച്ചയാകും. സന്ദർശനത്തിനിടെ ഇരുരാജ്യങ്ങളും തമ്മിൽ വലിയ സാമ്പത്തിക കരാറുകൾക്ക് വഴിയൊരുങ്ങുമെന്നാണ് സൂചന.
ജപ്പാനിലെ സ്വകാര്യ കമ്പനികൾ ഏകദേശം 12.5 ബില്യൺ ഡോളർ മൂല്യമുള്ള 120-ഓളം സഹകരണ കരാറുകളിൽ ഒപ്പുവെച്ചേക്കും. ഇന്ത്യയിലെ സാമ്പത്തിക വളർച്ചയിലുള്ള ജപ്പാന്റെ വിശ്വാസമാണ് ഈ വൻ നിക്ഷേപ വാഗ്ദാനങ്ങൾ സൂചിപ്പിക്കുന്നത്. ഇന്ത്യാ-ജപ്പാൻ ഇക്കണോമിക് ഫോറത്തിൽ 150-ൽ അധികം കമ്പനികൾ പങ്കെടുക്കുന്നുണ്ട്. സർക്കാർ തലത്തിലുള്ള സഹകരണത്തിനൊപ്പം വാണിജ്യ രംഗത്തെ ബന്ധങ്ങൾ കൂടി ദൃഢമാക്കാനാണ് ഇരുരാജ്യങ്ങളും ലക്ഷ്യമിടുന്നത്.
Story Summary
Japanese Prime Minister Sanae Takaichi received a ceremonial welcome at Rashtrapati Bhavan on Thursday as she commenced her three-day visit to India. During the 16th India-Japan Annual Summit, the two nations are set to discuss critical areas such as economic security, semiconductor collaboration, and defense, with private firms expected to announce agreements worth $12.5 billion.
