അത്ലറ്റിക്സ് ഇന്റഗ്രിറ്റി യൂണിറ്റിന്റെ (AIU) ജൂൺ മാസത്തെ റിപ്പോർട്ട് പ്രകാരം ആഗോള തലത്തിൽ ഉത്തേജക മരുന്ന് ഉപയോഗിക്കുന്ന അത്ലറ്റുകളുടെ പട്ടികയിൽ ഇന്ത്യ ഒന്നാമത്. 162 താരങ്ങളാണ് പട്ടികയിൽ ഇന്ത്യയിൽ നിന്നുള്ളത്. ഇന്ത്യൻ കായികരംഗത്തെ സംബന്ധിച്ചിടത്തോളം വലിയൊരു ആശങ്കയാണിത് (India Top Dope Offenders). 148 പേരുമായി കെനിയ രണ്ടാമതും 60-ൽ അധികം പേരുമായി റഷ്യ മൂന്നാമതുമാണ്. ഉത്തേജക മരുന്ന് ഉപയോഗിച്ചവർക്ക് പുറമെ, പരിശോധനയിൽ നിന്ന് ഒഴിഞ്ഞുമാറുക, തെളിവ് നശിപ്പിക്കുക തുടങ്ങിയ നിയമലംഘനം നടത്തിയവരും ഈ പട്ടികയിലുണ്ട്.
ഏപ്രിൽ മാസത്തിലാണ് കെനിയയെ പിന്തള്ളി ഇന്ത്യ ഈ പട്ടികയിൽ ഒന്നാമതെത്തിയത്. കഴിഞ്ഞ രണ്ട് വർഷമായി ഉത്തേജക മരുന്ന് ഉപയോഗത്തിൽ ഇന്ത്യ ഒന്നാമതായതിനെത്തുടർന്ന്, ‘അത്യന്തം അപകടകരമായ’ വിഭാഗത്തിലാണ് ഇന്ത്യയെ വേൾഡ് അത്ലറ്റിക്സ് ഉൾപ്പെടുത്തിയിരിക്കുന്നത്. ഇതിന്റെ ഭാഗമായി അത്ലറ്റിക്സ് ഫെഡറേഷൻ ഓഫ് ഇന്ത്യയെ (AFI) കാറ്റഗറി ബിയിൽ നിന്ന് കാറ്റഗറി എയിലേക്ക് മാറ്റി. ഇതോടെ ഇന്ത്യൻ താരങ്ങൾക്കുമേൽ കർശനമായ പരിശോധനകൾ ഏർപ്പെടുത്താൻ അത്ലറ്റിക്സ് ഇന്റഗ്രിറ്റി യൂണിറ്റ് നിർദ്ദേശിച്ചിട്ടുണ്ട്.
2022 മുതൽ 2025 വരെയുള്ള കണക്കുകൾ പ്രകാരം ആഗോള തലത്തിൽ ഉത്തേജക മരുന്ന് ഉപയോഗം ഏറ്റവും കൂടുതൽ നടക്കുന്ന ആദ്യ രണ്ട് രാജ്യങ്ങളിൽ ഇന്ത്യയുണ്ട്. കാറ്റഗറി എയിൽ ഉൾപ്പെട്ടതുകൊണ്ട്, ലോക അത്ലറ്റിക്സ് മത്സരങ്ങളിലും ഒളിമ്പിക്സിലും പങ്കെടുക്കുന്ന ഇന്ത്യൻ താരങ്ങൾ ഇനി മുതൽ കൂടുതൽ കർശനമായ പരിശോധനകൾക്ക് വിധേയരാകേണ്ടി വരും. ദേശീയ ടീമിലെ അത്ലറ്റുകൾക്കായി ശക്തമായ പരിശോധനാ സംവിധാനം നടപ്പിലാക്കാൻ അത്ലറ്റിക്സ് ഫെഡറേഷൻ ബാധ്യസ്ഥരാണ്.
Summary: India continues to top the Athletics Integrity Unit’s (AIU) global list of dope offenders with 162 recorded cases, surpassing Kenya and Russia. Following this trend, World Athletics has designated India as an ‘extremely high’ risk country for doping, re-categorizing the Athletics Federation of India from Category B to Category A. This status mandates more stringent testing and compliance requirements for Indian athletes ahead of major international competitions, reflecting the urgent need to address systemic doping issues within the country’s sporting landscape.
