ഉത്തരേന്ത്യയിൽ തുടരുന്ന കനത്ത മഴയിൽ ഐഐടി റൂർക്കി ക്യാമ്പസ് വെള്ളത്തിനടിയിലായെങ്കിലും, ദുരിതത്തെ അതിജീവിക്കാൻ വിദ്യാർത്ഥികൾ കണ്ടെത്തിയ വഴി സോഷ്യൽ മീഡിയയിൽ കൗതുകമാകുന്നു (IIT Roorkee floating platform). വെള്ളക്കെട്ടുള്ള ക്യാമ്പസിലൂടെ യാത്ര ചെയ്യാൻ വിദ്യാർത്ഥികൾ ഒരു ഫ്ലോട്ടിംഗ് പ്ലാറ്റ്ഫോം സ്വയം തയ്യാറാക്കി. ഒരു വലിയ ഷീറ്റിൽ കയറിനിന്ന് വള്ളം തുഴയുന്നതുപോലെ നീളമുള്ള കമ്പുകൾ ഉപയോഗിച്ച് വെള്ളത്തിലൂടെ യാത്ര ചെയ്യുന്ന വിദ്യാർത്ഥികളുടെ വീഡിയോ ഇതിനകം വൈറലായിക്കഴിഞ്ഞു.
ഹോസ്റ്റൽ ഏരിയയിൽ നിന്ന് ക്യാമ്പസിന്റെ മറ്റ് ഭാഗങ്ങളിലേക്ക് പോകാൻ വഴികളില്ലാത്ത അവസ്ഥയിലാണ് വിദ്യാർത്ഥികൾ ഈ ‘ജലയാനം’ ഒരുക്കിയത്. കൂടാതെ, മെസ്സിലെ ജീവനക്കാർക്ക് ഹോസ്റ്റലിലെത്തി ഭക്ഷണം പാകം ചെയ്യാൻ സഹായിക്കാനും ഈ പ്ലാറ്റ്ഫോം ഉപകരിച്ചു. ‘ബണ്ടി ഓർ ബബ്ലി’ എന്ന ചിത്രത്തിലെ ‘ധടക് ധടക്’ എന്ന പാട്ടിന്റെ പശ്ചാത്തലത്തിൽ എത്തിയ വീഡിയോ കണ്ട് പലരും അത്ഭുതവും സന്തോഷവും പ്രകടിപ്പിച്ചു. വടക്കേ ഇന്ത്യയിലുടനീളം വ്യാപകമായ മഴയും വെള്ളപ്പൊക്കവും റിപ്പോർട്ട് ചെയ്യുന്ന സാഹചര്യത്തിലാണ് ഐഐടി റൂർക്കി ക്യാമ്പസും വെള്ളത്തിലായത്.
ഇന്ത്യയിലെ മുൻനിര എൻജിനീയറിംഗ് ഇൻസ്റ്റിറ്റ്യൂട്ടിലെ വിദ്യാർത്ഥികൾ തങ്ങളുടെ പ്രശ്നങ്ങൾക്ക് കണ്ടെത്തിയ ഈ സർഗ്ഗാത്മകമായ പരിഹാരത്തെ സോഷ്യൽ മീഡിയ വാനോളം പുകഴ്ത്തി. ക്യാമ്പസ് ഇപ്പോൾ ഒരു ബോട്ടിംഗ് കേന്ദ്രം പോലെ തോന്നിക്കുന്നുവെന്ന് ചിലർ തമാശരൂപേണ കമന്റ് ചെയ്തു. പ്രതിസന്ധി ഘട്ടങ്ങളിലും തളരാതെ, എൻജിനീയറിംഗ് മികവ് പുറത്തെടുത്ത വിദ്യാർത്ഥികൾക്ക് വലിയ സ്വീകരണമാണ് സമൂഹമാധ്യമങ്ങളിൽ ലഭിക്കുന്നത്.
