ന്യൂഡൽഹി: ദേശീയ അന്വേഷണ ഏജൻസി (NIA), ഐഎസ്ആർഒ (ISRO), ഡിആർഡിഒ (DRDO), വ്യോമയാന മന്ത്രാലയം എന്നിവയുൾപ്പെടെയുള്ള ഉന്നത സ്ഥാപനങ്ങൾക്ക് നേരെ വ്യാജ ബോംബ് ഭീഷണി മുഴക്കിയ 36-കാരൻ പിടിയിൽ. ഗാസിയാബാദ് സന്യോഗ് നഗർ സ്വദേശി നിഷാന്ത് ത്യാഗിയെയാണ് ഡൽഹി പോലീസ് പിടികൂടിയത്. ജൂൺ 29-നാണ് ഇയാൾ വിവിധ സ്ഥാപനങ്ങളിലേക്ക് ഭീഷണി ഇമെയിലുകൾ അയച്ചത്.(Hoax bomb threat Delhi, Police arrests Ghaziabad man)
ന്യൂഡൽഹിയിൽ നിന്ന് ന്യൂയോർക്കിലേക്ക് പോകുന്ന എയർ ഇന്ത്യ വിമാനത്തിന് നേരെയും ഇയാൾ ഭീഷണി മുഴക്കിയിരുന്നു. ഇതേത്തുടർന്ന് സുരക്ഷാ ഏജൻസികൾ ഉണർന്നുപ്രവർത്തിക്കുകയും സുരക്ഷാ പരിശോധനകൾ കർശനമാക്കുകയും ചെയ്തു. അന്വേഷണത്തിൽ ബോംബ് ഭീഷണി വ്യാജമാണെന്ന് കണ്ടെത്തുകയായിരുന്നു. പോലീസ് നടത്തിയ ഡിജിറ്റൽ ട്രാക്കിംഗിലൂടെയും സാങ്കേതിക പരിശോധനയിലൂടെയുമാണ് ഇമെയിലുകൾക്ക് പിന്നിലെ വ്യക്തിയെ തിരിച്ചറിഞ്ഞത്. ജൂൺ 30-ന് തന്നെ ഇയാളെ വീട്ടിൽ നിന്ന് പോലീസ് കസ്റ്റഡിയിലെടുത്തു.
പ്രതി നിഷാന്ത് ത്യാഗി 2008 മുതൽ മാനസികാരോഗ്യ ചികിത്സയിലാണെന്ന് പോലീസ് അറിയിച്ചു. ഇയാളുടെ കുടുംബാംഗങ്ങളും ഇക്കാര്യം സ്ഥിരീകരിച്ചിട്ടുണ്ട്. ഇയാൾക്ക് ഇത്തരമൊരു കൃത്യം ചെയ്യാൻ പ്രേരിപ്പിച്ച സാഹചര്യങ്ങളെക്കുറിച്ച് പോലീസ് കൂടുതൽ അന്വേഷണം നടത്തിവരികയാണ്.
Story Summary
Delhi Police have arrested 36-year-old Nishant Tyagi from Ghaziabad for sending a series of hoax bomb threat emails to major national institutions, including the NIA, ISRO, and DRDO, as well as an Air India flight. Investigators tracked the digital trail to the suspect, who has reportedly been undergoing treatment for mental illness since 2008, and confirm that no explosives were found during the investigation.
