ചെന്നൈ: ലോകേഷ് കനകരാജിന്റെ സിനിമാറ്റിക് യൂണിവേഴ്സിലെ ഏറ്റവും ശ്രദ്ധേയമായ കഥാപാത്രങ്ങളിലൊന്നായ റോളക്സിന്റെ തിരിച്ചുവരവിനായി ആരാധകർ കാത്തിരിക്കുമ്പോൾ, ചിത്രത്തെക്കുറിച്ച് തനിക്കും വ്യക്തമായ വിവരങ്ങളില്ലെന്ന് നടൻ സൂര്യ (Suriya on Rolex movie). റോളക്സ് സ്പിൻ-ഓഫ് സിനിമയുടെ നിലവിലെ പുരോഗതിയെക്കുറിച്ച് സംവിധായകൻ ലോകേഷ് കനകരാജിനാണ് കൂടുതൽ അറിയുകയെന്നും, പദ്ധതി യാഥാർഥ്യമാകേണ്ട സമയത്ത് സംഭവിക്കുമെന്നും സൂര്യ പറഞ്ഞു. ദ ഹോളിവുഡ് റിപ്പോർട്ടർ ഇന്ത്യയ്ക്ക് നൽകിയ അഭിമുഖത്തിലാണ് സൂര്യയുടെ പ്രതികരണം.
“ലോകേഷ് ഇപ്പോൾ അല്ലു അർജുനൊപ്പമുള്ള സിനിമയുടെ തിരക്കിലാണ്. അതിന് ശേഷം വിക്രം 2 ഉൾപ്പെടെയുള്ള പദ്ധതികളും അദ്ദേഹത്തിനുണ്ട്. റോളക്സ് കഥാപാത്രത്തെക്കുറിച്ച് അദ്ദേഹം അഭിമുഖങ്ങളിൽ പറയുന്നതും കഥ എഴുതുന്നതായി സൂചിപ്പിക്കുന്നതും കാണാറുണ്ട്. എന്നാൽ എന്താണ് നടക്കുന്നതെന്ന് എനിക്കറിയില്ല. സംഭവിക്കേണ്ട സമയത്ത് അത് സംഭവിക്കും; സമയം തീരുമാനിക്കട്ടെ,” എന്നായിരുന്നു സൂര്യയുടെ വാക്കുകൾ. 2022-ൽ പുറത്തിറങ്ങിയ കമൽഹാസൻ ചിത്രം വിക്രംത്തിന്റെ ക്ലൈമാക്സിലൂടെയാണ് സൂര്യ റോളക്സ് എന്ന ക്രൂരനായ ഗാങ്സ്റ്റർ കഥാപാത്രമായി പ്രത്യക്ഷപ്പെട്ടത്. വളരെ കുറച്ച് സമയത്തെ സ്ക്രീൻ സാന്നിധ്യമുണ്ടായിരുന്നെങ്കിലും കഥാപാത്രത്തിന്റെ അവതരണവും പശ്ചാത്തല സംഗീതവും സൂര്യയുടെ വ്യത്യസ്തമായ രൂപഭാവവും വലിയ ശ്രദ്ധ നേടി. തുടർന്ന് റോളക്സിനെ കേന്ദ്രകഥാപാത്രമാക്കി പ്രത്യേക സിനിമ ഒരുങ്ങുമെന്ന സൂചനകൾ പുറത്തുവന്നിരുന്നു. എന്നാൽ പദ്ധതിയുടെ ഔദ്യോഗിക പ്രഖ്യാപനമോ ചിത്രീകരണവുമായി ബന്ധപ്പെട്ട വിവരങ്ങളോ ഇതുവരെ പുറത്തുവന്നിട്ടില്ല.
അതേസമയം, സംവിധായകൻ ജിത്തു മാധവനൊപ്പമുള്ള തന്റെ പുതിയ ചിത്രം പൂർത്തിയായതായും സൂര്യ അഭിമുഖത്തിൽ വ്യക്തമാക്കി. ആവേശം, രോമാഞ്ചം എന്നീ ചിത്രങ്ങളുടെ സംവിധായകനായ ജിത്തു മാധവൻ ഒരുക്കുന്ന സിനിമയുടെ ചിത്രീകരണം അടുത്തിടെയാണ് അവസാനിച്ചത്. സൂര്യയുടെ ഹോം ബാനറാണ് ചിത്രം നിർമ്മിക്കുന്നത്. നസ്രിയയാണ് ചിത്രത്തിലെ നായിക. സിനിമ ഈ വർഷാവസാനം തിയേറ്ററുകളിലെത്തുമെന്നാണ് സൂര്യ അറിയിച്ചത്. വെങ്കി അറ്റ്ലൂരി സംവിധാനം ചെയ്യുന്ന വിശ്വനാഥൻ ആൻഡ് സൺസ് ആണ് സൂര്യയുടെ മറ്റൊരു പുതിയ ചിത്രം. മമിത ബൈജുവാണ് ചിത്രത്തിലെ നായിക. ഓഗസ്റ്റ് 14-നാണ് സിനിമയുടെ റിലീസ് പ്രഖ്യാപിച്ചിരിക്കുന്നത്. ചിത്രത്തിനായി സൂര്യ ഗാനം ആലപിച്ചിട്ടുണ്ടെന്ന പ്രത്യേകതയും ഇതിനുണ്ട്.
റോളക്സ് സിനിമയെക്കുറിച്ച് വ്യക്തമായ വിവരങ്ങൾ നൽകാൻ സൂര്യക്കുപോലും കഴിയാത്ത സാഹചര്യത്തിൽ, ലോകേഷ് കനകരാജിന്റെ ഔദ്യോഗിക പ്രഖ്യാപനത്തിനായുള്ള കാത്തിരിപ്പിലാണ് ആരാധകർ. വിക്രംത്തിലെ ചെറിയ വേഷത്തിലൂടെ വലിയ സ്വീകാര്യത നേടിയ റോളക്സ് വീണ്ടും എപ്പോൾ വെള്ളിത്തിരയിലെത്തുമെന്ന ചോദ്യത്തിന് നിലവിൽ വ്യക്തമായ മറുപടിയില്ല.
Summary: Suriya has said that he has no clear update on the proposed Rolex spin-off and that director Lokesh Kanagaraj is currently occupied with other major projects. The actor added that the much-awaited film will happen when the time is right. Suriya also shared updates on his completed film with director Jithu Madhavan and his upcoming release Vishwanathan and Sons.
