ഗാന്ധിനഗർ: ഗുജറാത്തിലെ തദ്ദേശ സ്ഥാപനങ്ങളിലേക്കുള്ള തെരഞ്ഞെടുപ്പിന്റെ വോട്ടെണ്ണൽ പുരോഗമിക്കുമ്പോൾ ഭരണകക്ഷിയായ ബിജെപി വലിയ മുന്നേറ്റം കാഴ്ചവെക്കുന്നു. 15 മുൻസിപ്പൽ കോർപ്പറേഷനുകൾ, 84 മുൻസിപ്പാലിറ്റികൾ, ഇരുനൂറിലധികം ജില്ലാ-താലൂക്ക് പഞ്ചായത്തുകൾ എന്നിവിടങ്ങളിലേക്കാണ് വോട്ടെണ്ണൽ നടക്കുന്നത്.(Gujarat Local Body Election Result 2026, Counting underway for over 9,000 seats)
രാവിലെ എട്ട് മണിക്ക് വോട്ടെണ്ണൽ ആരംഭിച്ചത് മുതൽ പ്രധാന കേന്ദ്രങ്ങളിലെല്ലാം ബിജെപി വ്യക്തമായ ലീഡ് നിലനിർത്തുകയാണ്. അഹമ്മദാബാദ്, വൽസാദ്, വാപി തുടങ്ങിയ നഗരങ്ങളിൽ ബിജെപി സ്ഥാനാർത്ഥികൾ വലിയ മുന്നേറ്റം നടത്തുന്നു. 700-ലധികം സീറ്റുകളിൽ ബിജെപി സ്ഥാനാർത്ഥികൾ നേരത്തെ തന്നെ എതിരില്ലാതെ തിരഞ്ഞെടുക്കപ്പെട്ടിരുന്നു. ബിജെപിയും കോൺഗ്രസും ആം ആദ്മി പാർട്ടിയും തമ്മിലുള്ള ത്രികോണ മത്സരമാണ് ഗുജറാത്തിൽ ഇത്തവണ നടന്നത്.
ഏപ്രിൽ 26-ന് നടന്ന വോട്ടെടുപ്പിൽ കടുത്ത ഉഷ്ണതരംഗത്തെയും അവഗണിച്ച് ജനങ്ങൾ പോളിംഗ് ബൂത്തുകളിലേക്ക് എത്തിയിരുന്നു. മുൻസിപ്പൽ കോർപ്പറേഷനുകൾ: 48.55% മുൻസിപ്പാലിറ്റികൾ: 58% ജില്ലാ-താലൂക്ക് പഞ്ചായത്തുകൾ: 60-61% എന്നിങ്ങനെയാണ് കണക്ക്. പ്രധാനമന്ത്രി നരേന്ദ്ര മോദി പോസ്റ്റൽ ബാലറ്റ് വഴിയും കേന്ദ്ര ആഭ്യന്തര മന്ത്രി അമിത് ഷാ അഹമ്മദാബാദിലെ നരാൻപുരയിൽ നേരിട്ടെത്തിയും വോട്ട് രേഖപ്പെടുത്തിയിരുന്നു.
