ന്യൂഡൽഹി: ചില്ലറ ഇന്ധന വിൽപ്പന കേന്ദ്രങ്ങളിൽ നിന്ന് വ്യവസായ, വാണിജ്യ, സ്ഥാപനപരമായ ആവശ്യങ്ങൾക്കായി ഇന്ധനം വാങ്ങുന്നതിന് കേന്ദ്രസർക്കാർ താൽക്കാലിക നിയന്ത്രണം ഏർപ്പെടുത്തി. ജൂൺ 11-ന് പെട്രോളിയം-പ്രകൃതിവാതക മന്ത്രാലയം പുറത്തിറക്കിയ ‘മോട്ടോർ സ്പിരിറ്റ് ആൻഡ് ഹൈ സ്പീഡ് ഡീസൽ ഉത്തരവ്, 2026’ പ്രകാരമാണ് ഈ നടപടി.(Fuel purchase restrictions, Government Imposes 90 Day Restriction On Bulk Fuel Purchases At Retail Petrol Pumps)
ചില്ലറ വിപണിയിലെയും ബൾക്ക് വിപണിയിലെയും ഇന്ധന വിലയിലുള്ള വലിയ അന്തരം മുതലെടുക്കാൻ പല വാണിജ്യ സ്ഥാപനങ്ങളും പെട്രോൾ പമ്പുകളെ ആശ്രയിക്കാൻ തുടങ്ങിയതാണ് സർക്കാരിനെ ഈ തീരുമാനത്തിലേക്ക് നയിച്ചത്. ഉദാഹരണത്തിന്, ഡൽഹിയിൽ ചില്ലറ വിപണിയിൽ ഡീസലിന് ഏകദേശം 95.20 രൂപയാണെങ്കിൽ, ബൾക്ക് വിപണിയിൽ ഇത് 134.50 രൂപയോളമാണ്. ഈ വലിയ വിലവ്യത്യാസം കാരണം വ്യവസായ സ്ഥാപനങ്ങൾ ബൾക്ക് വിതരണ സംവിധാനങ്ങൾ ഒഴിവാക്കി പെട്രോൾ പമ്പുകളിലേക്ക് മാറിയത് വിപണിയിൽ അസാധാരണമായ തിരക്കിന് കാരണമായി. കൂടാതെ, ആഗോളതലത്തിലെ ഭൂ-രാഷ്ട്രീയ സാഹചര്യങ്ങൾ ഇന്ധന വിതരണ ശൃംഖലയെ ബാധിച്ചതും സർക്കാർ മുൻകരുതൽ എടുക്കാൻ കാരണമായി.
ഇതൊരു സാധാരണ ഉപഭോക്താവിനെ ഒട്ടും ബാധിക്കില്ല. കാർ, ബൈക്ക് ഉടമകൾക്ക് തടസ്സമില്ലാതെ പെട്രോളും ഡീസലും ലഭിക്കുന്നത് ഉറപ്പാക്കാനാണ് ഈ നിയന്ത്രണം. അതേസമയം, പമ്പുകളിൽ നിന്ന് ഡീസൽ വാങ്ങുന്നതിന് കർശന നിയന്ത്രണം ഏർപ്പെടുത്തിയിട്ടുണ്ട്. പെട്രോളിയം ആൻഡ് എക്സ്പ്ലോസീവ്സ് സേഫ്റ്റി ഓർഗനൈസേഷൻ (PESO) അംഗീകരിച്ച വാഹന ടാങ്കുകളിലേക്കോ പാത്രങ്ങളിലേക്കോ മാത്രമേ ഡീസൽ നൽകാവൂ. ഒരു ഉപഭോക്താവിന് പ്രതിദിനം പരമാവധി 200 ലിറ്റർ ഡീസൽ മാത്രമേ നൽകാവൂ എന്നും ഉത്തരവിലുണ്ട്.
ഈ നിയന്ത്രണങ്ങൾ 90 ദിവസത്തേക്കാണ് ഏർപ്പെടുത്തിയിരിക്കുന്നത്. സാഹചര്യങ്ങൾക്കനുസരിച്ച് സർക്കാർ ഇത് നീട്ടിയേക്കാം. നിയമവിരുദ്ധമായി ഇന്ധനം സംഭരിക്കുന്നവർക്കും കരിഞ്ചന്തയിൽ വിൽക്കുന്നവർക്കുമെതിരെ ശക്തമായ നടപടി സ്വീകരിക്കാൻ സംസ്ഥാന സർക്കാരുകൾക്ക് നിർദ്ദേശം നൽകിയിട്ടുണ്ട്.
Story Summary
The Indian government has restricted industrial and commercial users from purchasing bulk fuel at retail petrol pumps for 90 days to prevent shortages and manage price disparities. While individual vehicle owners will face no impact, the new order caps daily diesel sales at 200 litres per vehicle and mandates that institutional buyers use authorized bulk supply channels.
