ജഗിത്യാൽ: പതിറ്റാണ്ടുകൾ നീണ്ട സായുധ പോരാട്ടത്തിന് ശേഷം മുഖ്യധാരയിലേക്ക് മടങ്ങിയെത്തിയ മുൻ മാവോയിസ്റ്റ് കമാൻഡർ തിപ്പിരി തിരുപ്പതി എന്ന ദേവ്ജി തന്റെ 62-ാം വയസ്സിൽ പരീക്ഷാ ഹാളിലെത്തി (Former Maoist Leader Devji Exam). തെലങ്കാന ബോർഡ് ഓഫ് ഇന്റർമീഡിയറ്റ് എഡ്യൂക്കേഷൻ നടത്തുന്ന സപ്ലിമെന്ററി പരീക്ഷയുടെ ഭാഗമായി രണ്ടാം വർഷ തെലുങ്ക് പരീക്ഷയാണ് അദ്ദേഹം എഴുതിയത്. ജഗിത്യാൽ ജില്ലയിലെ കൊരുട്ട്ലയിലുള്ള മെസ്ട്രോ ജൂനിയർ കോളേജിലായിരുന്നു പരീക്ഷാ കേന്ദ്രം.
1983-ൽ ഇന്റർമീഡിയറ്റ് വിദ്യാർത്ഥിയായിരിക്കെയാണ് ദേവ്ജി മാവോയിസ്റ്റ് പ്രസ്ഥാനത്തിൽ ചേർന്നത്. 1985-ൽ പരീക്ഷ എഴുതിയെങ്കിലും രണ്ടാം വർഷ തെലുങ്ക് വിഷയത്തിൽ അദ്ദേഹം പരാജയപ്പെട്ടിരുന്നു. തുടർന്ന് ഒളിവിൽ പോയ അദ്ദേഹം സിപിഐ (മാവോയിസ്റ്റ്) പാർട്ടിയുടെ സെൻട്രൽ കമ്മിറ്റി അംഗം, പോളിറ്റ് ബ്യൂറോ അംഗം എന്നീ നിലകളിലേക്ക് ഉയർന്നു. പീപ്പിൾസ് ലിബറേഷൻ ഗറില്ലാ ആർമിയുടെ (PLGA) സൈനിക വിഭാഗത്തിന്റെ തലവനായും അദ്ദേഹം പ്രവർത്തിച്ചു. ഒരു കോടി രൂപയോളം തലയ്ക്ക് വിലയുണ്ടായിരുന്ന ഇദ്ദേഹം 44 വർഷത്തെ ഒളിവ് ജീവിതത്തിന് ശേഷം 2026 ഫെബ്രുവരിയിലാണ് തെലങ്കാന പോലീസിന് മുന്നിൽ കീഴടങ്ങിയത്.
കീഴടങ്ങിയ ശേഷം സാധാരണ ജീവിതം നയിക്കുന്ന അദ്ദേഹം, താൻ പാതിവഴിയിൽ ഉപേക്ഷിച്ച വിദ്യാഭ്യാസം പൂർത്തിയാക്കണമെന്ന ആഗ്രഹത്തോടെയാണ് വീണ്ടും പരീക്ഷയ്ക്ക് തയ്യാറെടുത്തത്. കൊരുട്ട്ലയിലെ അരുണോദയ ഡിഗ്രി കോളേജിലെ അധ്യാപിക ഗംഗുല ലാവണ്യയുടെ കീഴിൽ പ്രത്യേക പരിശീലനം നേടിയാണ് പരീക്ഷ എഴുതിയത്. ഉന്നത വിദ്യാഭ്യാസം തുടരാനും സമൂഹത്തിന്റെ ഭാഗമായി സമാധാനപരമായി ജീവിക്കാനുമാണ് താൻ ആഗ്രഹിക്കുന്നതെന്ന് പരീക്ഷയ്ക്ക് ശേഷം ദേവ്ജി പ്രതികരിച്ചു. സായുധ വിപ്ലവത്തിന്റെ പാത വെടിഞ്ഞ് അക്ഷരങ്ങളുടെ ലോകത്തേക്ക് മടങ്ങിയ ദേവ്ജിയുടെ ഈ മാറ്റം വലിയ പൊതുജനശ്രദ്ധയാണ് നേടിയിരിക്കുന്നത്.
Summary: Former top Maoist commander Thippiri Tirupati alias Devji appeared for the Intermediate Telugu supplementary exam in Telangana after a gap of 43 years. Devji, who joined the Maoist movement in 1983 and carried a reward of Rs 1 crore, surrendered in February 2026. Now aged 62, he aims to complete his education and fully reintegrate into civilian life.
