ജംഗാവോൺ: തെലങ്കാനയിൽ മദ്യലഹരിയിലായിരുന്ന യുവാവ് ആർടിസി ബസ് മോഷ്ടിച്ച് 21 കിലോമീറ്ററോളം ഓടിച്ചു. ഒടുവിൽ ടോൾ ഗേറ്റിലെ സിമന്റ് ബ്ലോക്കിൽ ഇടിച്ച് ബസ് നിർത്തിയ യുവാവിനെ പോലീസ് കസ്റ്റഡിയിലെടുത്തു. ചെന്നുരു ഗ്രാമത്തിലെ ബുൾഡോസർ ഓപ്പറേറ്ററായ ജിത്തബോയിന വെങ്കണ്ണയാണ് അറസ്റ്റിലായത്. (Drunk Man Steals Bus)
കുടുംബപ്രശ്നങ്ങളെത്തുടർന്ന് ജംഗാവോണിലെത്തിയ വെങ്കണ്ണ, മദ്യപിച്ച ശേഷം ബസ് സ്റ്റാൻഡിൽ നിർത്തിയിട്ടിരുന്ന വാടക ആർടിസി ബസ് മോഷ്ടിക്കുകയായിരുന്നു. ബുധനാഴ്ച രാത്രി സർവീസ് അവസാനിപ്പിച്ച് ബസ് സ്റ്റാൻഡിൽ നിർത്തിയിട്ടിരുന്ന ബസിൽ ഡ്രൈവർ അശ്രദ്ധമായി താക്കോൽ വെച്ചിരുന്നു. ഇത് മുതലെടുത്താണ് വ്യാഴാഴ്ച പുലർച്ചെ മൂന്നുമണിയോടെ യുവാവ് ബസ് സ്റ്റാർട്ട് ചെയ്ത് ഓടിച്ചുപോയത്.
സൂര്യപേട്ട ഭാഗത്തേക്ക് ബസ് ഓടിച്ച ഇയാൾ 21 കിലോമീറ്റർ സഞ്ചരിച്ച ശേഷം ദേവരുപ്പുല മണ്ഡലത്തിലെ സിംഗരാജുപള്ളി ടോൾ ഗേറ്റിലെ സിമന്റ് ബ്ലോക്കിൽ ഇടിക്കുകയായിരുന്നു. ടോൾ ഗേറ്റ് ജീവനക്കാരുടെ സംശയത്തെത്തുടർന്ന് പോലീസെത്തി യുവാവിനെ കസ്റ്റഡിയിലെടുത്തു. പ്രാഥമിക അന്വേഷണത്തിൽ ഇയാൾ മദ്യലഹരിയിലാണെന്ന് സ്ഥിരീകരിച്ചു. ബസ് ഉടമ നൽകിയ പരാതിയിൽ കേസെടുത്ത് അന്വേഷണം ആരംഭിച്ചതായി ജംഗാവോൺ സർക്കിൾ ഇൻസ്പെക്ടർ സത്യനാരായണ റെഡ്ഡി അറിയിച്ചു.
Summary: A drunk man, identified as Jittaboyina Venkanna, stole a hired RTC bus from the Jangaon bus stand in Telangana after finding the keys left inside the vehicle. He drove the bus for 21 kilometers before crashing it into a cement block at the Singarajupalli toll gate. The accused, who is a bulldozer operator, was taken into custody by local police, and a case has been registered following a complaint from the bus owner.
