ചെന്നൈ: തമിഴ്നാട്ടിലെ പൊതുഗതാഗത സൗകര്യം മെച്ചപ്പെടുത്തുന്നതിന്റെ ഭാഗമായി 300 പുതിയ സർക്കാർ ബസുകൾ മുഖ്യമന്ത്രി സി. ജോസഫ് വിജയ് ഫ്ലാഗ് ഓഫ് ചെയ്തു. ചെന്നൈ സെക്രട്ടേറിയറ്റിൽ നടന്ന ചടങ്ങിൽ 127.21 കോടി രൂപ ചെലവഴിച്ച് നിർമ്മിച്ച 164 ഡീസൽ ബസുകളും 136 സി.എൻ.ജി ബസുകളുമാണ് അദ്ദേഹം ഉദ്ഘാടനം ചെയ്തത് (CM Vijay flagged TNSTC Buses). ചടങ്ങിന് ശേഷം, പെരമ്പൂരിലേക്ക് പോകുകയായിരുന്ന ഒരു ബസിൽ കയറി മുഖ്യമന്ത്രി യാത്ര ചെയ്തത് കൗതുകകരമായ കാഴ്ചയായി. ബസിൽ വെച്ച് കൃത്യമായ തുക നൽകി ടിക്കറ്റെടുത്ത അദ്ദേഹം, യാത്രക്കാർക്കും ജീവനക്കാർക്കുമൊപ്പം സമയം ചെലവഴിക്കുകയും അവരുടെ അനുഭവങ്ങൾ ചോദിച്ചറിയുകയും ചെയ്തു.
അണ്ണാ സ്ക്വയറിൽ നിന്ന് പെരമ്പൂരിലേക്കുള്ള ബസിലായിരുന്നു മുഖ്യമന്ത്രിയുടെ യാത്ര. യാത്രയ്ക്കിടെ ബസ് ജീവനക്കാരുമായി സൗഹൃദപരമായി സംസാരിച്ച അദ്ദേഹം, യാത്രയുടെ ദൃശ്യങ്ങൾ മൊബൈലിൽ പകർത്തുകയും ചെയ്തു. മെട്രോപൊളിറ്റൻ ട്രാൻസ്പോർട്ട് കോർപ്പറേഷന് (MTC) 65 ബസുകൾ നൽകിയതിന് പുറമെ സേലം, കോയമ്പത്തൂർ, വില്ലുപുരം, കുംഭകോണം, മധുര ഡിവിഷനുകൾക്കും പുതിയ ബസുകൾ വീതിച്ചു നൽകി. കാലപ്പഴക്കം ചെന്ന ബസുകൾക്ക് പകരമായി പുതിയവ നിരത്തിലിറക്കുന്നത് വഴി യാത്രാ സൗകര്യവും സുരക്ഷയും വർധിപ്പിക്കുകയാണ് സർക്കാരിന്റെ ലക്ഷ്യം. തിരക്കേറിയ സമയങ്ങളിൽ യാത്രക്കാരുടെ കാത്തിരിപ്പ് സമയം കുറയ്ക്കാനും ഇതിലൂടെ സാധിക്കും. തന്റെ മണ്ഡലമായ പെരമ്പൂരിലേക്കുള്ള ബസിലെ മുഖ്യമന്ത്രിയുടെ ഈ അപ്രതീക്ഷിത യാത്ര രാഷ്ട്രീയ നിരീക്ഷകർക്കിടയിലും വലിയ ചർച്ചയായിട്ടുണ്ട്.
Summary: Tamil Nadu Chief Minister C. Joseph Vijay flagged off 300 new government buses, including diesel and eco-friendly CNG models, at a function in Chennai. The fleet, procured for ₹127.21 crore, aims to bolster public transport connectivity across the state. Following the inauguration, CM Vijay surprised onlookers by boarding a public bus bound for Perambur, purchasing his own ticket, and interacting with fellow passengers and staff during the journey.
