ഹോർമുസ് കടലിടുക്കിലൂടെ സഞ്ചരിച്ച രണ്ട് എണ്ണ ടാങ്കറുകൾ ഖനിയിൽ തട്ടി പൊട്ടിത്തെറിച്ചെന്ന ഇറാൻ വിപ്ലവ ഗാർഡ് സേനയുടെ അവകാശവാദം യുഎസ് സെൻട്രൽ കമാൻഡ് തള്ളി (Hormuz Tanker Explosion Claim). ഈ വാർത്ത അടിസ്ഥാനരഹിതമാണെന്ന് യുഎസ് സൈന്യം എക്സിലൂടെ വ്യക്തമാക്കി. അമേരിക്കൻ ആക്രമണം കാരണം ഹോർമുസ് കടലിടുക്ക് അങ്ങേയറ്റം സുരക്ഷിതമല്ലാത്തതും പൂർണ്ണമായും അടച്ചിട്ടതുമാണെന്നായിരുന്നു ഇറാൻ വാർത്താ ഏജൻസിയായ തസ്നിം റിപ്പോർട്ട് ചെയ്തത്. എന്നാൽ, ഏത് ടാങ്കറുകളാണ് അപകടത്തിൽപ്പെട്ടതെന്നോ അവയുടെ ഉടമസ്ഥരെക്കുറിച്ചോ ഉള്ള കൂടുതൽ വിവരങ്ങൾ നൽകാൻ ഇറാൻ തയ്യാറായില്ല.
മധ്യേഷ്യയിൽ അമേരിക്കയും ഇറാനും തമ്മിലുള്ള സൈനിക സംഘർഷം രൂക്ഷമാകുന്നതിനിടെയാണ് ഇത്തരമൊരു അവകാശവാദവുമായി ഇറാൻ രംഗത്തെത്തിയത്. ഇറാനിലെ പാലങ്ങൾ, ഊർജ്ജ കേന്ദ്രങ്ങൾ, തുറമുഖങ്ങളിലെ നിർമ്മിതികൾ എന്നിവ ലക്ഷ്യമാക്കി കഴിഞ്ഞ ഏഴ് ദിവസമായി യുഎസ് സൈന്യം തുടർച്ചയായി ആക്രമണങ്ങൾ നടത്തിവരികയാണ്. ഇതിന് മറുപടിയായി ഖത്തറിലേക്കും കുവൈറ്റിലേക്കും ഇറാൻ മിസൈൽ ആക്രമണം നടത്തി. കുവൈറ്റിലെ ജലശുദ്ധീകരണ പ്ലാന്റിന് ആക്രമണത്തിൽ കേടുപാടുകൾ സംഭവിച്ചിട്ടുണ്ട്. മേഖലയിൽ സൈനിക നടപടികൾ കൂടുതൽ ശക്തിപ്പെടുത്തുമെന്ന് യുഎസ് പ്രസിഡന്റ് ഡൊണാൾഡ് ട്രംപ് മുന്നറിയിപ്പ് നൽകിയിരുന്നു. ഇരുരാജ്യങ്ങളും തമ്മിലുള്ള സൈനിക ആക്രമണങ്ങളിൽ സൈനികർക്കും സാധാരണക്കാർക്കും വലിയ തോതിൽ ജീവഹാനിയും പരിക്കുകളും സംഭവിച്ചതായാണ് പുറത്തുവരുന്ന റിപ്പോർട്ടുകൾ.
Summary: US Central Command (CENTCOM) has officially denied reports from Iran’s Revolutionary Guard (IRGC) claiming that two oil tankers exploded after hitting mines in the Strait of Hormuz. This incident occurs amid escalating regional hostilities, with the US continuing its series of retaliatory strikes on Iranian military and infrastructure sites, prompting Iranian missile responses against US-allied nations.
