ന്യൂഡൽഹി: ചന്ദ്രയാൻ-3 ദൗത്യം പൂർത്തിയാക്കി കാലങ്ങൾ കഴിഞ്ഞിട്ടും ശാസ്ത്രലോകത്തെ അത്ഭുതപ്പെടുത്തുന്ന കണ്ടെത്തലുകളുമായി ഐഎസ്ആർഒ (Chandrayaan 3 Hop Experiment Vikram Lander). ദൗത്യത്തിന്റെ അവസാന മണിക്കൂറുകളിൽ ലാൻഡറിൽ അവശേഷിച്ച ഇന്ധനം ഉപയോഗിച്ച് ശാസ്ത്രജ്ഞർ നടത്തിയ അപ്രതീക്ഷിത ‘ഹോപ്പ് പരീക്ഷണം’ (Hop Experiment) ചന്ദ്രന്റെ ദക്ഷിണധ്രുവത്തെക്കുറിച്ചുള്ള പുതിയ ശാസ്ത്രീയ നിഗമനങ്ങളിലേക്ക് വഴിതുറന്നിരിക്കുകയാണ്. ചന്ദ്രോപരിതലത്തിൽ നിന്ന് 40-50 സെന്റീമീറ്റർ ഉയർന്ന് മാറി ലാൻഡ് ചെയ്ത വിക്രം ലാൻഡറിലെ ‘ചാസ്തേ’ (ChaSTE) ഉപകരണം ശേഖരിച്ച വിവരങ്ങൾ വിശകലനം ചെയ്തപ്പോഴാണ് ‘ശിവശക്തി പോയിന്റിലെ’ മണ്ണ് അതീവ സങ്കീർണ്ണവും വൈവിധ്യമാർന്നതുമാണെന്ന് വ്യക്തമായത്.
ലാൻഡറിന്റെ എഞ്ചിൻ വീണ്ടും ജ്വലിപ്പിച്ചപ്പോൾ ഉപരിതലത്തിലെ മുകളിലത്തെ മൂന്ന് സെന്റീമീറ്ററോളം വരുന്ന മൃദുവായ മണ്ണ് തെറിച്ചുപോയിരുന്നു. ഇതിനടിയിലുള്ള കൂടുതൽ സാന്ദ്രതയേറിയതും കട്ടിയുള്ളതുമായ മണ്ണിലാണ് പിന്നീട് പരിശോധന നടത്തിയത്. ചന്ദ്രന്റെ ഉപരിതലത്തിലെ മണ്ണ് കേക്ക് പോലെ പല പാളികളായിട്ടാണ് കിടക്കുന്നതെന്നും ഏതാനും സെന്റീമീറ്ററുകൾക്കുള്ളിൽ തന്നെ ഇതിന്റെ ഭൗതിക-താപ ഗുണങ്ങളിൽ വലിയ മാറ്റങ്ങളുണ്ടെന്നും ശാസ്ത്രജ്ഞർ കണ്ടെത്തി. നാസയുടെ ആർട്ടെമിസ് (Artemis) ദൗത്യം വഴി ചന്ദ്രനിൽ സ്ഥിരമായ താവളങ്ങൾ നിർമ്മിക്കാൻ ഒരുങ്ങുന്ന ആഗോള ശാസ്ത്രസമൂഹത്തിന് ഈ കണ്ടെത്തൽ നിർണ്ണായകമാകും. 2008-ൽ ചന്ദ്രനിൽ ജലാംശത്തിന്റെ സാന്നിധ്യം കണ്ടെത്തിയ ചന്ദ്രയാൻ-1 ന് പിന്നാലെ, ചന്ദ്രന്റെ മണ്ണിന്റെ ഘടന കൃത്യമായി രേഖപ്പെടുത്തി ചന്ദ്രയാൻ-3 വീണ്ടും ചരിത്രം കുറിക്കുകയാണ്.
Summary: An unplanned “Hop Experiment” executed by ISRO’s Chandrayaan-3 Vikram lander using residual fuel has yielded groundbreaking scientific insights into the Moon’s south polar region. By lifting itself 40 to 50 centimeters and relocating, the lander’s engine plume cleared away the loose top layer of lunar soil (regolith).
