മുംബൈ: സർക്കാരിനെതിരെ പ്രതിഷേധിച്ചതിന്റെ പേരിൽ മുംബൈ പോലീസ് എടുത്ത കടുത്ത നടപടി ബോംബെ ഹൈക്കോടതി റദ്ദാക്കി.എസ് ഡി പി ഐ ജനറൽ സെക്രട്ടറി സയീദ് അഹമ്മദ് അബ്ദുൾ വാഹിദ് ചൗധരിയെ (49) നാടുകടത്തിക്കൊണ്ടുള്ള ഉത്തരവാണ് ജസ്റ്റിസ് മാധവ് ജാംദാർ അധ്യക്ഷനായ ബെഞ്ച് റദ്ദാക്കിയത്.(Bombay High Court quashes externment order against activist)
കേന്ദ്ര സർക്കാരിന്റെ വിവിധ തീരുമാനങ്ങൾക്കെതിരെ പ്രതിഷേധം സംഘടിപ്പിച്ചതിനെത്തുടർന്ന് സയീദ് അഹമ്മദിനെതിരെ അഞ്ച് എഫ്ഐആറുകൾ രജിസ്റ്റർ ചെയ്തിരുന്നു. ഇതിന്റെ അടിസ്ഥാനത്തിൽ, അദ്ദേഹത്തെ മുംബൈയിൽ നിന്നും സമീപപ്രദേശങ്ങളിൽ നിന്നും ഒരു വർഷത്തേക്ക് നാടുകടത്താൻ ഡെപ്യൂട്ടി പോലീസ് കമ്മീഷണർ ഉത്തരവിടുകയായിരുന്നു.
ഈ നടപടിക്കെതിരെ സയീദ് അഹമ്മദ് ഹൈക്കോടതിയെ സമീപിച്ചു. വാദം കേൾക്കുന്നതിനിടെ, ‘ബിജെപി സർക്കാർ മുർദാബാദ്’, ‘അമിത് ഷാ മുർദാബാദ്’ തുടങ്ങിയ മുദ്രാവാക്യങ്ങൾ വിളിക്കുന്നത് എന്തിനാണ് നാടുകടത്തലിലേക്ക് നയിക്കുന്നതെന്ന് കോടതി പോലീസിനോട് ചോദിച്ചു. പോലീസ് ഉദ്യോഗസ്ഥർ പൊതുജനങ്ങളോട് ഉത്തരം പറയേണ്ടവരാണെന്നും, മന്ത്രിമാരുടെ വെറും ഉദ്യോഗസ്ഥരല്ലെന്നും കോടതി ഓർമ്മിപ്പിച്ചു.
സർക്കാർ തീരുമാനങ്ങൾക്കെതിരെ പ്രതിഷേധിക്കാനും പ്രക്ഷോഭം നടത്താനും പൗരന്മാർക്ക് അവകാശമുണ്ടെന്നും, കേവലം പ്രതിഷേധത്തിന്റെയോ മുദ്രാവാക്യം വിളിച്ചതിന്റെയോ പേരിൽ അവരെ സ്വന്തം നഗരത്തിൽ നിന്ന് പുറത്താക്കാൻ പോലീസിന് കഴിയില്ലെന്നും കോടതി വ്യക്തമാക്കി. സയീദ് അഹമ്മദിനെതിരായ നടപടി പോലീസിന്റെ അധികാര ദുർവിനിയോഗമാണെന്നും, അദ്ദേഹത്തിന്റെ പ്രതിഷേധങ്ങൾ മുംബൈ പോലീസ് ആക്ട് പ്രകാരമുള്ള നാടുകടത്തലിന് കാരണമാകില്ലെന്നും ജസ്റ്റിസ് ജാംദാർ നിരീക്ഷിച്ചു. ഭരണഘടന ഉറപ്പുനൽകുന്ന ആർട്ടിക്കിൾ 19, 21 എന്നിവയുടെ ലംഘനമാണ് ഈ നടപടിയെന്ന് ചൂണ്ടിക്കാട്ടിയാണ് കോടതി ഉത്തരവ് റദ്ദാക്കിയത്. പൗരന്മാരുടെ മൗലികാവകാശങ്ങളെ മാനിക്കണമെന്നും ഇത്തരം നടപടികൾ ജനാധിപത്യത്തിന് വിരുദ്ധമാണെന്നും കോടതി ഓർമ്മിപ്പിച്ചു.
Story Summary
The Bombay High Court has set aside an externment order issued against SDPI leader Saeed Ahmad Abdul Wahid Chaudhary, who was banished from Mumbai for protesting against government policies. The court ruled that peaceful protests against the government do not justify such extreme police measures, terming the action a misuse of power that violates fundamental rights.
