നവാദ: കോടതി വളപ്പിൽ വെച്ച് നടത്തിയ വധഭീഷണിക്ക് പിന്നാലെ ബിഹാറിലെ നവാദ ജില്ലയിൽ അയൽവാസികളായ അമ്മാവനെയും അനന്തരവനെയും ക്രൂരമായി കുത്തിക്കൊലപ്പെടുത്തി (Bihar Double Murder Case). രണ്ട് ദിവസത്തിനകം നിങ്ങളുടെ കുടുംബത്തിലെ രണ്ട് പേരെ കൊലപ്പെടുത്തുമെന്ന പ്രതികളുടെ ഭീഷണിക്ക് ശേഷം വെറും രണ്ട് മണിക്കൂർ തികയുന്നതിന് മുൻപാണ് ഇരുപത്തിരണ്ടുകാരനായ മുഹമ്മദ് കാഷിഫ്, ഇരുപത്തിയൊന്നുകാരനായ മുഹമ്മദ് അഹമ്മദ് എന്നിവർ കൊല്ലപ്പെട്ടത്. കഴിഞ്ഞ ആറുമാസമായി ഈ രണ്ട് കുടുംബങ്ങൾ തമ്മിൽ അതിർത്തി തർക്കങ്ങളും വ്യക്തിപരമായ മറ്റ് അസ്വാരസ്യങ്ങളും നിലനിന്നിരുന്നു. ഇതുമായി ബന്ധപ്പെട്ട് ഇരുവിഭാഗവും മുൻപ് തന്നെ പ്രാദേശിക പോലീസിൽ പരാതി നൽകുകയും കേസുകൾ രജിസ്റ്റർ ചെയ്യുകയും ചെയ്തിട്ടുള്ളതാണ്.
പഴയ കേസുകളിലൊന്നിൽ ജാമ്യം തേടി പ്രതിഭാഗത്തുനിന്നുള്ള ഫഹീം മല്ലിക് എന്നയാൾ തിങ്കളാഴ്ച കോടതിയിൽ എത്തിയിരുന്നുവെങ്കിലും കോടതി ഇയാളുടെ ജാമ്യാപേക്ഷ തള്ളുകയായിരുന്നു. ഇതിൽ പ്രകോപിതരായ പ്രതികളും ബന്ധുക്കളും കോടതി വളപ്പിൽ വെച്ച് ഇരകളുടെ കുടുംബത്തിന് നേരെ പരസ്യമായി വധഭീഷണി മുഴക്കുകയായിരുന്നു. കോടതിയിൽ നിന്ന് മടങ്ങിയെത്തിയ പ്രതികളായ മുഹമ്മദ് ഇംതിയാസ്, ഇസ്തിഖാർ എന്നിവർ മാരകായുധങ്ങളുമായി കാത്തിരിക്കുകയും, യുവാക്കൾ സ്ഥലത്തെത്തിയ ഉടൻ ക്രൂരമായി ആക്രമിക്കുകയുമായിരുന്നു. ആക്രമണം തടയാൻ ശ്രമിച്ച മറ്റ് പലർക്കും ഗുരുതരമായി പരിക്കേൽക്കുകയും അവർ ആശുപത്രിയിൽ ചികിത്സയിൽ കഴിയുകയുമാണ്. സംഭവത്തെത്തുടർന്ന് ഗ്രാമത്തിൽ കനത്ത പോലീസ് കാവൽ ഏർപ്പെടുത്തിയിട്ടുണ്ട്. പ്രതികളിൽ ഒരാൾ പോലീസിന് മുന്നിൽ കീഴടങ്ങിയിട്ടുണ്ട്.
Summary: An old animosity led to a double murder in Bihar’s Nawada district, where an uncle and nephew were stabbed to death. The brutal attack occurred just two hours after the accused issued a death threat within court premises following a rejected bail application. While one of the suspects has surrendered to the authorities, a heavy police deployment and forensic teams remain at the village to maintain order and track remaining suspects.
