ന്യൂഡൽഹി: തിഹാർ ജയിലിലെ എരിവും എണ്ണയുമുള്ള ഇന്ത്യൻ ഭക്ഷണം കഴിക്കാൻ സാധിക്കുന്നില്ലെന്നും സ്വന്തമായി ഭക്ഷണം പാചകം ചെയ്യാൻ അനുവദിക്കണമെന്നും ആവശ്യപ്പെട്ട് ഭീകരവാദക്കേസിൽ എൻഐഎ അറസ്റ്റ് ചെയ്ത അമേരിക്കൻ പൗരൻ ഡൽഹി കോടതിയെ സമീപിച്ചു. പാട്യാല ഹൗസ് കോടതിയിലാണ് യുഎസ് സ്വദേശിയായ മാത്യു ആരോൺ വാൻഡൈക്ക് ഈ വിചിത്ര ഹർജി നൽകിയത്. ജയിൽ ഭക്ഷണം കാരണം താൻ കഴിഞ്ഞ 50 ദിവസത്തിലേറെയായി നിരാഹാരത്തിലാണെന്നും സ്വന്തം ചെലവിൽ അടുക്കള സൗകര്യവും സാധനങ്ങളും അനുവദിക്കണമെന്നുമാണ് ഇയാളുടെ ആവശ്യം.(American Terror Suspect In Tihar Jail Seeks Permission To Cook Own Meals Due To Spicy Food)
കഴിഞ്ഞ ഏപ്രിൽ മുതൽ തിഹാർ ജയിലിൽ കഴിയുന്ന വാൻഡൈക്ക്, മെയ് 6 മുതൽ ജയിൽ ഭക്ഷണം ബഹിഷ്കരിച്ചിരിക്കുകയാണെന്ന് ഹർജിയിൽ പറയുന്നു. അമേരിക്കൻ പൗരനായ തനിക്ക് ജയിലിലെ എരിവും എണ്ണയും നിറഞ്ഞ ഭക്ഷണം ദഹനപ്രശ്നങ്ങളുണ്ടാക്കുന്നു. ഇതുമൂലം 14 കിലോയോളം ഭാരം കുറഞ്ഞതായും കാഴ്ചശക്തിയെയും പ്രതിരോധശേഷിയെയും ഇത് ബാധിച്ചതായും ഇയാൾ ആരോപിക്കുന്നു. പരിപ്പ്, ചിക്കൻ, മട്ടൻ, പാസ്ത, ഒലീവ് ഓയിൽ, സോയ മിൽക്ക് തുടങ്ങിയ സാധനങ്ങൾ സ്വന്തം ചെലവിൽ വാങ്ങി ഇൻഡക്ഷൻ കുക്കർ ഉപയോഗിച്ച് പാകം ചെയ്യാൻ അനുവദിക്കണമെന്നാണ് ആവശ്യം. ഹർജിയിൽ കോടതി തിഹാർ ജയിൽ അധികൃതരുടെ മറുപടി തേടിയിട്ടുണ്ട്. കേസ് ജൂലൈ 21-ലേക്ക് മാറ്റി.
കഴിഞ്ഞ മാർച്ച് 13-നാണ് ഇന്ത്യക്കെതിരെ ഭീകരപ്രവർത്തനങ്ങൾക്ക് ഗൂഢാലോചന നടത്തിയെന്ന കേസിൽ വാൻഡൈക്കിനെയും 6 ഉക്രെയ്ൻ സ്വദേശികളെയും കൊൽക്കത്ത വിമാനത്താവളത്തിൽ വെച്ച് എൻഐഎ അറസ്റ്റ് ചെയ്തത്. നിരോധിത ഇന്ത്യൻ വിഘടനവാദി ഗ്രൂപ്പുകളുമായി ഇവർക്ക് ബന്ധമുണ്ടെന്നും മ്യാൻമർ അതിർത്തി കടന്ന് വിഘടനവാദികൾക്ക് ഡ്രോൺ ഉൾപ്പെടെയുള്ള ആയുധ പരിശീലനം നൽകിയെന്നുമാണ് കേസ്. യുഎപിഎ നിയമപ്രകാരമാണ് ഇവർക്കെതിരെ കേസ് എടുത്തിട്ടുള്ളത്.
Story Summary
An American mercenary, Matthew Aaron VanDyke, arrested by the NIA under UAPA, has moved a Delhi court seeking permission to cook his own meals in Tihar Jail. He claimed that the spicy and greasy Indian prison food forced him to go on a hunger strike for over 50 days, leading to severe health deterioration and a loss of 14 kg. The court has sought a response from Tihar Jail authorities and scheduled the next hearing for July 21, 2026.
