ന്യൂഡൽഹി: അഹമ്മദാബാദിൽ നിന്ന് ലണ്ടനിലേക്ക് പറന്നുയരുന്നതിനിടെ തകർന്നു വീണ എയർ ഇന്ത്യ വിമാനം തകർത്തത് ഒട്ടനവധി പേരുടെ സ്വപ്നങ്ങൾ കൂടിയാണ്. അഹമ്മദാബാദ് വിമാനദുരന്തത്തിൻ്റെ ഒന്നാം വാർഷികമായ ഇന്ന് എയർ ഇന്ത്യ ജീവനക്കാർ ആദരാഞ്ജലികൾ അർപ്പിക്കും. കഴിഞ്ഞ വർഷം ജൂൺ 12-ന് സംഭവിച്ച ഈ ദാരുണമായ വിമാനാപകടത്തിൽ മരിച്ചവരുടെ ഓർമ്മയ്ക്കായി ഉച്ചയ്ക്ക് 1:39 മുതൽ 1:41 വരെ രണ്ട് മിനിറ്റ് മൗനാനുഷ്ഠാനം ആചരിക്കും.(Air India Observes First Anniversary Of Tragic AI171 Crash)
2025 ജൂൺ 12-ന് നടന്ന ഈ അപകടം ഇന്ത്യൻ വ്യോമയാന ചരിത്രത്തിലെ ഏറ്റവും വലിയ ദുരന്തങ്ങളിലൊന്നായിരുന്നു. അഹമ്മദാബാദിൽ നിന്ന് ലണ്ടൻ ഗാറ്റ്വിക്കിലേക്ക് പുറപ്പെട്ട എയർ ഇന്ത്യയുടെ ബോയിംഗ് 787-8 ഡ്രീംലൈനർ വിമാനം ടേക്ക്-ഓഫിന് തൊട്ടുപിന്നാലെയാണ് തകർന്നു വീണത്. വിമാനത്തിലുണ്ടായിരുന്ന 242 പേരിൽ 241 പേരും, നിലത്തുണ്ടായിരുന്ന 19 പേരും ഉൾപ്പെടെ ആകെ 260 ജീവനുകളാണ് ഈ അപകടത്തിൽ പൊലിഞ്ഞത്. വിമാനത്തിലുണ്ടായിരുന്ന 12 ജീവനക്കാരും അപകടത്തിൽ മരണപ്പെട്ടു.
ദുരന്തത്തിന് ശേഷം ടാറ്റ ഗ്രൂപ്പിന്റെ നേതൃത്വത്തിൽ വലിയ തോതിലുള്ള പുനരധിവാസ പ്രവർത്തനങ്ങളും നഷ്ടപരിഹാര വിതരണവുമാണ് നടപ്പിലാക്കിയത്. ഇതിനകം മരിച്ചവരുടെ കുടുംബങ്ങൾക്ക് 25 ലക്ഷം രൂപ വീതം ഇടക്കാല നഷ്ടപരിഹാരവും, ടാറ്റ ഗ്രൂപ്പിന്റെ മെമ്മോറിയൽ ട്രസ്റ്റ് വഴി ഒരു കോടി രൂപ വീതം എക്സ്-ഗ്രേഷ്യ സഹായവും ഭൂരിഭാഗം കുടുംബങ്ങൾക്കും വിതരണം ചെയ്തു കഴിഞ്ഞു.
അപകടകാരണത്തെക്കുറിച്ച് എയർക്രാഫ്റ്റ് ആക്സിഡന്റ് ഇൻവെസ്റ്റിഗേഷൻ ബ്യൂറോ അന്വേഷണം തുടരുകയാണ്. സുരക്ഷാ സംവിധാനങ്ങൾ കൂടുതൽ കർശനമാക്കുന്നതിന്റെ ഭാഗമായി വ്യോമയാന മന്ത്രാലയത്തിന്റെ മേൽനോട്ടത്തിൽ എയർ ഇന്ത്യ തങ്ങളുടെ വിമാനങ്ങളുടെ പരിശോധനകൾ ശക്തമാക്കിയിട്ടുണ്ട്. ഡൽഹി ഉൾപ്പെടെയുള്ള പ്രധാന കേന്ദ്രങ്ങളിൽ സുരക്ഷാ ഓഡിറ്റുകളുടെ എണ്ണം വർദ്ധിപ്പിക്കുകയും ജീവനക്കാരുടെ മാനസികാരോഗ്യത്തിനായി വെൽനസ്.എഐ എന്ന പേരിൽ പുതിയ പിന്തുണ സംവിധാനം ആരംഭിക്കുകയും ചെയ്തു.
Summary
Air India employees across India and the UK observed a two-minute silence to commemorate the first anniversary of the tragic AI171 crash, which claimed 260 lives last June. While the airline continues its compensation and rehabilitation efforts for the affected families, official investigations into the cause of the Boeing 787-8 disaster remain ongoing.
