വയനാട് : കള്ളാടിയിലുണ്ടായ മണ്ണിടിച്ചിൽ ദുരന്തത്തിൽ കാണാതായ രണ്ടുപേർക്കായുള്ള തിരച്ചിൽ രക്ഷാപ്രവർത്തകർ ഇന്നും തുടരും. കഴിഞ്ഞ ദിവസം നടത്തിയ തിരച്ചിലിൽ മൂന്ന് മൃതദേഹങ്ങൾ കണ്ടെടുത്തിരുന്നു. മീനാക്ഷിപുഴ കേന്ദ്രീകരിച്ചും ദുരന്തമേഖലയിലെ സോൺ ഒന്നിലും മൂന്നിലുമാണ് ഇന്ന് പ്രധാനമായും പരിശോധന നടക്കുന്നത്. പ്രദേശത്ത് ശക്തമായ മഴ തുടരുന്ന സാഹചര്യത്തിൽ വടക്കൻ കേരളത്തിൽ അതീവ ജാഗ്രതാ നിർദേശമുണ്ട്.(Wayanad Kalladi Landslide Rescue Operations Continue Tunnel Project Construction Halted)
മണ്ണിടിച്ചിലിന്റെ പശ്ചാത്തലത്തിൽ നിർദിഷ്ട തുരങ്കപാതയുടെ ആനക്കാംപൊയിൽ ഭാഗത്തെ നിർമാണ പ്രവൃത്തികൾ അധികൃതർ താത്കാലികമായി നിർത്തിവെച്ചു. രണ്ട് ഷിഫ്റ്റുകളിലായി മുന്നൂറോളം തൊഴിലാളികളായിരുന്നു ഇവിടെ ജോലി ചെയ്തിരുന്നത്. നിർമാണം നടക്കുന്ന ഭാഗം ഭൂരിഭാഗവും പാറക്കെട്ടുകൾ നിറഞ്ഞതായതിനാൽ മണ്ണിടിച്ചിൽ സാധ്യത കുറവാണെന്നാണ് പ്രാഥമിക നിഗമനമെങ്കിലും സുരക്ഷ മുൻനിർത്തിയാണ് നടപടി.
ദുരന്തമുണ്ടായ മേഖലയിൽ പരിശോധന നടത്തുന്നതിനായി കൊങ്കൺ റെയിൽവേ കോർപ്പറേഷന്റെ ഡൽഹിയിൽ നിന്നുള്ള വിദഗ്ധ സംഘം ഇന്ന് വയനാട്ടിലെത്തും. ഇതിന് പുറമെ, വിവാദമായ കള്ളാടി തുരങ്കപാത പദ്ധതിയുടെ പാരിസ്ഥിതിക ആഘാതത്തെയും സുരക്ഷിതത്വത്തെയും കുറിച്ച് പഠിക്കാൻ സർക്കാർ നിയോഗിക്കുന്ന ഉന്നതതല വിദഗ്ധ സമിതിയെ ഇന്ന് പ്രഖ്യാപിച്ചേക്കും. പ്രമുഖ ജിയോളജിസ്റ്റുകളും തുരങ്കപാത വിദഗ്ധരും അടങ്ങുന്ന സമിതി നൽകുന്ന റിപ്പോർട്ടിന്റെ അടിസ്ഥാനത്തിലാകും ഈ പദ്ധതിയുടെ ഭാവി സർക്കാർ തീരുമാനിക്കുക.
Story Summary
The search operations continue in Wayanad’s Kalladi for the two missing persons following a landslide, after three bodies were recovered yesterday. Construction work for the proposed underground tunnel project at the Anakkampoyil site has been temporarily suspended for safety. A central expert team from Konkan Railway and a state-appointed panel are visiting the site to study the environmental impacts and assess the project’s viability.
