തിരുവനന്തപുരം: കാൻസർ ബാധിതരായ 14 വയസ്സിന് താഴെയുള്ള കുട്ടികളുടെ ചികിത്സയ്ക്കായി പുതിയ സാമൂഹിക പ്രതിബദ്ധതാ പദ്ധതിയുമായി വി-ഗാർഡ് ഇൻഡസ്ട്രീസ് ലിമിറ്റഡ് (V Guard anahatam project). ‘അനഹതം’ എന്ന പേരിൽ നടപ്പിലാക്കുന്ന പദ്ധതിയിലൂടെ തിരുവനന്തപുരം റീജിയണൽ കാൻസർ സെന്ററിൽ (RCC) ചികിത്സയിൽ കഴിയുന്ന 30 കുട്ടികൾക്ക് സാമ്പത്തിക സഹായം ലഭ്യമാക്കും.
വാർഷിക വരുമാനം മൂന്ന് ലക്ഷം രൂപയിൽ താഴെയുള്ള നിർദ്ധന കുടുംബങ്ങളിലെ കുട്ടികൾക്കാണ് പദ്ധതിയുടെ പ്രയോജനം ലഭിക്കുക. എറണാകുളം ആസ്ഥാനമായി പ്രവർത്തിക്കുന്ന ‘ആരോഹ്’ (AROH) എന്ന സന്നദ്ധ സംഘടനയുമായി സഹകരിച്ചാണ് വി-ഗാർഡ് ഫൗണ്ടേഷൻ ഈ ഉദ്യമം നടപ്പിലാക്കുന്നത്.
“കുട്ടികളുടെ ആരോഗ്യവും ഭാവിയും സംരക്ഷിക്കുക എന്നത് സമൂഹത്തിന്റെ കൂട്ടായ ഉത്തരവാദിത്തമാണ്. കാൻസർ ബാധിതരായ കുട്ടികൾക്ക് ചികിത്സയ്ക്കൊപ്പം പ്രത്യാശയും പിന്തുണയും ഒരുപോലെ ആവശ്യമാണ്. ഇത്തരം പ്രതിസന്ധി ഘട്ടങ്ങളിൽ ആ കുടുംബങ്ങൾക്ക് കൈത്താങ്ങാകേണ്ടത് ഞങ്ങളുടെ ഉത്തരവാദിത്തമാണെന്ന് വി-ഗാർഡ് ഫൗണ്ടേഷൻ വിശ്വസിക്കുന്നു. ഈ പദ്ധതിയിലൂടെ അവരുടെ ജീവിതത്തിൽ പ്രതീക്ഷയുടെ വെളിച്ചമാകാൻ സാധിക്കുമെന്നാണ് ഞങ്ങൾ കരുതുന്നത്,” എന്ന് വി-ഗാർഡ് ഇൻഡസ്ട്രീസ് ലിമിറ്റഡിന്റെയും വി-ഗാർഡ് ഫൗണ്ടേഷന്റെയും ഡയറക്ടർ ഡോ. റീനാ മിഥുൻ ചിറ്റിലപ്പിള്ളി പറഞ്ഞു.
നേരത്തെ, കേരള പോലീസ് ഓഫീസേഴ്സ് അസോസിയേഷനുമായി ചേർന്ന് വനിതകളിലെ സ്തനാർബുദം നേരത്തെ കണ്ടെത്താനായി ‘കാൻസർ ഷീൽഡ്’ എന്ന പേരിൽ വി-ഗാർഡ് പദ്ധതി നടപ്പിലാക്കിയിരുന്നു. എറണാകുളം, കോട്ടയം ജില്ലകളിൽ സംഘടിപ്പിച്ച സൗജന്യ മാമോഗ്രാം, അൾട്രാസൗണ്ട് സ്ക്രീനിംഗ് ക്യാമ്പുകളിലൂടെ ആയിരത്തിലധികം വനിതകൾക്ക് സേവനം ലഭ്യമാക്കിയിരുന്നു. വിദ്യാഭ്യാസം, ആരോഗ്യം, വനിതാ ശാക്തീകരണം, പരിസ്ഥിതി സംരക്ഷണം എന്നീ മേഖലകളിൽ കമ്പനി നടപ്പിലാക്കി വരുന്ന വിവിധ സാമൂഹിക സേവന പ്രവർത്തനങ്ങളുടെ തുടർച്ചയായാണ് ഈ പദ്ധതിയും അവതരിപ്പിച്ചിരിക്കുന്നത്.
Story Summary:
V-Guard Industries Ltd. has launched ‘Anahatam’, a CSR initiative to support 30 cancer-affected children under the age of 14 undergoing treatment at RCC Thiruvananthapuram. Partnering with the NGO AROH, the project targets families with an annual income below ₹3 lakh.
