കോട്ടയം: തന്റെ ഗുരുതരമായ ആരോഗ്യസ്ഥിതിയെക്കുറിച്ചുള്ള ആശങ്കകളും രോഗവിവരങ്ങളും ആരാധകരുമായി പങ്കുവെച്ച് സോഷ്യൽ മീഡിയ താരം രേണു സുധി (Renu Sudhi cancer treatment). നിലവിൽ രോഗം മൂന്നാം സ്റ്റേജിലാണെന്നും (Stage 3 Cancer) ഹൃദയത്തിലെ മസിലുകളിലേക്കും ശ്വാസകോശത്തിലേക്കും ക്യാൻസർ കോശങ്ങൾ വ്യാപിച്ചതായും അവസ്ഥ അല്പം മോശമാണെന്നും മുൻപ് താരം വെളിപ്പെടുത്തിയിരുന്നു. രോഗവ്യാപ്തി കൂടിയ പശ്ചാത്തലത്തിൽ കടുത്ത വേദനയിലൂടെയാണ് താൻ കടന്നുപോകുന്നതെന്നും എന്നാൽ മനക്കരുത്തോടെ രോഗത്തോട് പോരാടുമെന്നും രേണു ഇൻസ്റ്റാഗ്രാമിൽ കുറിച്ചു.
ചികിത്സയുടെ ആദ്യ ഘട്ടത്തിൽ ഡോക്ടർമാർ ആറ് കീമോതെറാപ്പിയാണ് നിർദ്ദേശിച്ചിരിക്കുന്നത്. മൂന്നാഴ്ച കൂടുമ്പോൾ ഒരു കീമോ വീതം ചെയ്യാനാണ് തീരുമാനം. ആദ്യ കീമോ കഴിഞ്ഞതിന് പിന്നാലെ കഠിനമായ ശാരീരിക ബുദ്ധിമുട്ടുകളിലൂടെയാണ് താൻ കടന്നുപോകുന്നതെന്നും കീമോ പൂർത്തിയായ ശേഷം സർജറി നടത്തുവാൻ പദ്ധതിയിട്ടിട്ടുണ്ടെന്നും രേണു വ്യക്തമാക്കി. കോട്ടയം മെഡിക്കൽ കോളേജ് ആശുപത്രിയിലാണ് നിലവിൽ താരത്തിന്റെ ചികിത്സ നടക്കുന്നത്.
“ഇനി കോട്ടയം മെഡിക്കൽ കോളേജ് ആണ് എന്റെ തറവാട്. ഇവിടെയാണ് എന്റെ ചികിത്സ. എത്ര വർഷം മുന്നോട്ട് പോകുമെന്ന് അറിയില്ല. എനിക്ക് വേണ്ടി പ്രാർത്ഥിച്ചില്ലെങ്കിലും റിഥപ്പന്റെ അമ്മയ്ക്ക് വേണ്ടി പ്രാർത്ഥിക്കുക. എന്നോട് ശത്രുതയുള്ളവർ ഉണ്ടാകും, ഞാനായിട്ട് ആരോടും ഒരു തെറ്റും ചെയ്തിട്ടില്ല. കീമോയ്ക്ക് ശേഷം എന്നെ പുറത്തുനിർത്തിയിരുന്നു. ചേച്ചിയോടും ചേട്ടാപ്പിയോടുമാണ് എന്റെ ആരോഗ്യവുമായി ബന്ധപ്പെട്ട കാര്യങ്ങൾ ഡോക്ടർ സംസാരിച്ചത്. അവർ അതൊന്നും എന്നോട് പറഞ്ഞില്ല. ചിലപ്പോൾ സീരിയസ് ആയ കാര്യങ്ങളാകും. ഇവിടെ വീട്ടിൽ വന്നപ്പോഴും എന്നെ റൂമിൽ ഇരുത്തി കതകടച്ച് അകത്ത് ഇരുത്തിയിട്ടാണ് വീട്ടുകാരോട് കാര്യങ്ങൾ പറഞ്ഞത്. ഞാൻ അറിഞ്ഞത് വെച്ച് എന്റെ അവസ്ഥ കുറച്ച് സീരിയസ് ആണ്. എല്ലാവരും പ്രാർത്ഥിക്കണം” – രേണു കുറിച്ചു.
മരുന്നുകൾക്ക് ലക്ഷക്കണക്കിന് രൂപ ആവശ്യമായി വരുമെന്നും എന്നാൽ അങ്ങനെയൊരു തുക താൻ മുൻകൂട്ടി കരുതിയിരുന്നില്ലെന്നും രേണു പറയുന്നു. രോഗബാധയെത്തുടർന്ന് കുറച്ച് സ്റ്റേജ് പരിപാടികൾ മുടങ്ങിപ്പോയിരുന്നു. എന്നാൽ ഇത് പിരിവിന് വേണ്ടി പറയുന്നതല്ലെന്നും, തന്റെ യൂട്യൂബ് ചാനലിലെ വീഡിയോകൾക്ക് നല്ല വ്യൂസ് ഉണ്ടായാൽ മാത്രമേ മരുന്ന് വാങ്ങാനുള്ള തുക കണ്ടെത്താൻ സാധിക്കൂ എന്നും അതുകൊണ്ട് പ്രേക്ഷകർ ചാനലിനെ പിന്തുണയ്ക്കണമെന്നും താരം അഭ്യർത്ഥിച്ചു. ബിഗ് ബോസ് താരങ്ങൾ ഉൾപ്പെടെയുള്ള പ്രമുഖർ തന്ന ഫോണിൽ വിളിച്ച് ആശ്വസിപ്പിക്കുന്നുണ്ടെന്നും എവിടെ നിന്നോ കിട്ടിയ വലിയ മനക്കരുത്ത് തനിക്കുണ്ടെന്നും ബാക്കി കാര്യങ്ങൾ ദൈവത്തിന്റെ കൈയിലാണെന്നും രേണു കൂട്ടിച്ചേർത്തു.
വേദനയും ആവർത്തിച്ചുള്ള സൂചി കുത്തലുകളും ഒഴിവാക്കാനായി കോട്ടയം മെഡിക്കൽ കോളേജിൽ പി.ഐ.സി.സി ലൈൻ (PICC Line – Peripherally Inserted Central Catheter) വഴിയാണ് രേണുവിന് കീമോതെറാപ്പി മരുന്നുകൾ നൽകുന്നത്. കൈയിലെ ഒരു പ്രധാന രക്തക്കുഴലിലൂടെ പ്രത്യേക കാത്തറ്റർ സ്ഥാപിച്ച് മരുന്നുകൾ നേരിട്ട് ശരീരത്തിലേക്ക് എത്തിക്കാൻ സാധിക്കുന്ന അത്യാധുനിക സംവിധാനമാണിത്. ദീർഘകാല ക്യാൻസർ ചികിത്സയ്ക്ക് ഇത് ഏറെ സുരക്ഷിതവും സൗകര്യപ്രദവുമാണ്. രേണുവിന്റെ അടിയന്തിര രോഗമുക്തിക്കായി സോഷ്യൽ മീഡിയയിലൂടെ പ്രാർത്ഥനകളുമായി ഒപ്പമുണ്ടാകുമെന്ന് ആരാധകരും സുഹൃത്തുക്കളും അറിയിച്ചു.
Story Summary: Social media influencer Renu Sudhi shared an emotional update about her cancer treatment on Instagram. Currently undergoing stage 3 cancer treatment at Kottayam Medical College, she revealed that the disease has spread to her heart muscles and lungs. Doctors have prescribed six sessions of chemotherapy (one every three weeks) followed by surgery. She is receiving treatment through a PICC line to avoid painful repeated needle pricks. Requesting financial support through channel views, Renu stated that she has high mental strength to fight the disease.
