കൊല്ലം: സംസ്ഥാനത്ത് കടുത്ത ചൂട് തുടരുന്നതിനിടെ, ജോലിക്കിടെ കെഎസ്ഇബി ലൈൻമാന് സൂര്യാതപമേറ്റു. കുണ്ടറ സ്വദേശിയായ പത്മകുമാറിനാണ് പൊള്ളലേറ്റത്. പുനലൂർ കച്ചേരി റോഡിൽ ആശുപത്രി ജംഗ്ഷന് സമീപം വൈദ്യുതി ലൈൻ പരിശോധിക്കുന്നതിനിടെയായിരുന്നു സംഭവം.(Severe heat, KSEB lineman suffers heatstroke in Punalur)
ഉച്ചസമയത്ത് ലൈനിലെ അറ്റകുറ്റപ്പണികൾ പരിശോധിക്കുന്നതിനിടെയാണ് പത്മകുമാറിന് അസ്വസ്ഥത അനുഭവപ്പെട്ടത്. ശരീരത്തിലും കൈകളിലും സൂര്യാതപമേറ്റ് പൊള്ളലേറ്റ ഉടൻ തന്നെ സഹപ്രവർത്തകർ ഇദ്ദേഹത്തെ പുനലൂർ താലൂക്ക് ആശുപത്രിയിൽ എത്തിച്ചു. പ്രാഥമിക ശുശ്രൂഷകൾ നൽകി.
സംസ്ഥാനത്ത് ഏറ്റവും ഉയർന്ന താപനില രേഖപ്പെടുത്തുന്ന പ്രദേശങ്ങളിലൊന്നാണ് പുനലൂർ. കടുത്ത ചൂട് പരിഗണിച്ച് കെഎസ്ഇബി ജീവനക്കാർക്കായി പ്രത്യേക സുരക്ഷാ നിർദ്ദേശങ്ങൾ നിലവിലുണ്ട്. ഉച്ചയ്ക്ക് 12 മണി മുതൽ 3 മണി വരെ ഫീൽഡ് ജോലികൾക്ക് പോകരുതെന്ന് ലൈൻമാൻമാർക്ക് കർശന നിർദ്ദേശം നൽകിയിട്ടുണ്ട്.
