പാലക്കാട്: 111 ദിവസത്തിനുള്ളിൽ മണ്ഡലത്തിലെ 111 വികസന പദ്ധതികൾ പൂർത്തിയാക്കി നാടിന് സമർപ്പിക്കുമെന്ന ഉറച്ച പ്രഖ്യാപനത്തോടെ പാലക്കാട് എംഎൽഎ രമേശ് പിഷാരടിയുടെ പുതിയ ഓഫീസ് പ്രവർത്തനമാരംഭിച്ചു (Palakkad MLA office inauguration). പാലക്കാട് എംപി വി.കെ. ശ്രീകണ്ഠനാണ് എംഎൽഎ ഓഫീസിന്റെ ഔദ്യോഗിക ഉദ്ഘാടനം നിർവ്വഹിച്ചത്. ചടങ്ങിൽ രമേശ് പിഷാരടിയുടെ ഭാര്യ സൗമ്യ, മക്കളായ പൗർണമി, ഗിരിധർ, ഗോവർധൻ എന്നിവരും സന്നിഹിതരായിരുന്നു.
ഓഫീസ് ഉദ്ഘാടനത്തിനായി റിബൺ മുറിക്കാനുള്ള കത്രികയടക്കമുള്ള ഒരുക്കങ്ങളെല്ലാം നടത്തിയത് പിഷാരടിയുടെ മക്കളായ ഗിരിധറും ഗോവർദ്ധനും ചേർന്നായിരുന്നു. ഉദ്ഘാടന വേളയിൽ “ചെറിയ പിഷാരടി മുന്നോട്ട് നിൽക്കൂ” എന്ന് എംപി വി.കെ. ശ്രീകണ്ഠൻ തമാശയോടെ പറഞ്ഞത് ചടങ്ങിൽ പങ്കെടുത്തവരിലെല്ലാം ചിരി പടർത്തി.
മണ്ഡലത്തിന്റെ വികസനത്തിനായി കൃത്യമായ പദ്ധതികളോടെയാണ് താൻ മുന്നോട്ട് പോകുന്നതെന്ന് രമേശ് പിഷാരടി എംഎൽഎ വ്യക്തമാക്കി. മുൻ ജനപ്രതിനിധികൾ തുടങ്ങി വെച്ചതും, പുതുതായി ആരംഭിക്കുന്നതും, സാങ്കേതിക തടസ്സങ്ങളിൽ കുടുങ്ങിക്കിടക്കുന്നതുമായ മണ്ഡലത്തിലെ 111 പദ്ധതികളാണ് സമയബന്ധിതമായി പൂർത്തിയാക്കുകയെന്ന് അദ്ദേഹം അറിയിച്ചു. ജനപ്രതിനിധി എന്ന നിലയിലുള്ള പൂർണ്ണ ഉത്തരവാദിത്തം നിർവ്വഹിക്കുന്നതിനായി ഈ കാലയളവിൽ സിനിമകളിൽ നിന്നും സ്റ്റേജ് പ്രോഗ്രാമുകളിൽ നിന്നും പൂർണ്ണമായും മാറിനിൽക്കാനാണ് തന്റെ തീരുമാനമെന്നും അദ്ദേഹം കൂട്ടിച്ചേർത്തു.
മലയാളികളുടെ പ്രിയപ്പെട്ട അവതാരകൻ, നടൻ, സംവിധായകൻ എന്നീ നിലകളിൽ ദീർഘകാലമായി കലാ-സാംസ്കാരിക രംഗത്ത് സജീവ സാന്നിധ്യമാണ് രമേശ് പിഷാരടി. നടൻ സലിം കുമാറിന്റെ ‘കൊച്ചിൻ സ്റ്റാലിയൻസ്’ എന്ന മിമിക്രി ട്രൂപ്പിലൂടെ കരിയർ ആരംഭിച്ച അദ്ദേഹം, പിന്നീട് ധർമ്മജൻ ബോൾഗാട്ടിക്കൊപ്പം ചേർന്ന് ടെലിവിഷൻ രംഗത്തെ ജനപ്രിയ സാന്നിധ്യമായി മാറി. 2008-ൽ പുറത്തിറങ്ങിയ ‘പോസിറ്റീവ്’ എന്ന ചിത്രത്തിലൂടെ സിനിമാ അഭിനയത്തിലേക്ക് കടന്ന പിഷാരടി, പിന്നീട് ‘പഞ്ചവർണ്ണതത്ത’, ‘ഗാനഗന്ധർവ്വൻ’ എന്നീ ചിത്രങ്ങൾ സംവിധാനം ചെയ്തും ശ്രദ്ധ നേടിയിരുന്നു.
Story Summary: Palakkad MLA Ramesh Pisharody’s official office was inaugurated by Palakkad MP V.K. Sreekandan in the presence of his family. Pisharody announced a 111-day action plan to complete 111 development projects in the constituency and stated that he would take a break from films and stage shows to completely focus on public service.
