പാലക്കാട്: കോയമ്പത്തൂർ – തൃശൂർ ദേശീയപാതയിലെ ചന്ദ്രനഗറിൽ ടോറസ് ലോറിയും പാഴ്സൽ ലോറിയും തമ്മിൽ കൂട്ടിയിടിച്ച് വൻ അപകടം (Palakkad Chandranagar road accident today). അപകടത്തിൽ ഇരു വാഹനങ്ങളിലെയും ഡ്രൈവർമാർക്ക് പരിക്കേറ്റു. ഇവരെ ഉടൻ തന്നെ സമീപത്തെ ആശുപത്രിയിലേക്ക് മാറ്റി. ഇരുവരുടെയും പരിക്ക് ഗുരുതരമല്ലെന്നാണ് പ്രാഥമിക വിവരം. ഇന്ന് രാവിലെ ഏഴരയോടെയാണ് നാടിനെ നടുക്കിയ ഈ അപകടം സംഭവിച്ചത്.
ദേശീയപാതയിൽ രണ്ട് ദിശകളിൽ നിന്നും വന്ന വമ്പൻ ലോറികളാണ് ചന്ദ്രനഗറിന് സമീപം വെച്ച് നേർക്കുനേർ കൂട്ടിയിടിച്ചത്. തൃശൂർ ഭാഗത്തുനിന്നും കോയമ്പത്തൂരിലേക്ക് പോവുകയായിരുന്നു ടോറസ് ലോറി. ഈ സമയം കോയമ്പത്തൂർ ഭാഗത്തുനിന്ന് അമിതവേഗതയിൽ വരികയായിരുന്നു പാഴ്സൽ ലോറി.
പാഴ്സൽ ലോറിയുടെ ഡ്രൈവർ പുലർച്ചെയുള്ള യാത്രയ്ക്കിടയിൽ അശ്രദ്ധമായി ഉറങ്ങിപ്പോയതാണ് അപകടത്തിന് കാരണമായതെന്നാണ് പോലീസിന്റെ പ്രാഥമിക നിഗമനം. ഉറങ്ങിപ്പോയതോടെ ലോറി നിയന്ത്രണം വിട്ട് എതിരെ വന്ന ടോറസിലേക്ക് പാഞ്ഞുകയറുകയായിരുന്നു.
ഇടിയുടെ ശക്തമായ ആഘാതത്തിൽ ഇരു വാഹനങ്ങളുടെയും മുൻഭാഗം പൂർണ്ണമായും തകർന്ന നിലയിലാണ്. വലിയ ലോറികൾ റോഡിന് നടുവിൽ തന്നെ കിടന്നതിനാൽ തൃശൂർ – കോയമ്പത്തൂർ ദേശീയപാതയിൽ രാവിലെ മണിക്കൂറുകളോളം വൻ ഗതാഗതക്കുരുക്ക് അനുഭവപ്പെട്ടു.
സംഭവമറിഞ്ഞ് പാലക്കാട് ട്രാഫിക് പോലീസും നാട്ടുകാരും സ്ഥലത്തെത്തിയാണ് തകർന്ന ലോറിക്കുള്ളിൽ കുടുങ്ങിക്കിടന്ന ഡ്രൈവർമാരെ പുറത്തെടുത്തത്. തുടർന്ന് ക്രൈൻ ഉപയോഗിച്ച് വാഹനങ്ങൾ റോഡിന്റെ വശങ്ങളിലേക്ക് മാറ്റി ഗതാഗതം പുനഃസ്ഥാപിച്ചു. സംഭവത്തിൽ പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്.
Story Summary: A major accident occurred on the Coimbatore-Thrissur National Highway at Chandranagar, Palakkad, as a Taurus lorry and a parcel truck collided. Both drivers sustained injuries and were hospitalized after one driver reportedly fell asleep at the wheel.
