ആലപ്പുഴ: നവകേരള യാത്രയ്ക്കിടെ യൂത്ത് കോൺഗ്രസ് പ്രവർത്തകരെ മുഖ്യമന്ത്രിയുടെ സുരക്ഷാ ഉദ്യോഗസ്ഥർ മർദിച്ചതുമായി ബന്ധപ്പെട്ട കേസ് അട്ടിമറിക്കാൻ ശ്രമിച്ചെന്ന ആക്ഷേപത്തിൽ മുൻ ക്രമസമാധാന ചുമതലയുണ്ടായിരുന്ന എഡിജിപി എം.ആർ. അജിത് കുമാറിന്റെ ഓഫീസിലെ ഉദ്യോഗസ്ഥരെ പ്രത്യേക അന്വേഷണ സംഘം ഇന്ന് ചോദ്യം ചെയ്യും (Navakerala Sadas Youth Congress Attack Case). എഡിജിപിയുടെ ഓഫീസിൽ ഗ്രേഡ് എസ്ഐമാരായി ജോലി ചെയ്തിരുന്ന ഗിരീഷ്, ശ്രീകാന്ത് എന്നിവർക്കാണ് ആലപ്പുഴ ക്രൈംബ്രാഞ്ച് ഓഫീസിൽ നേരിട്ട് ഹാജരാകാൻ അന്വേഷണസംഘം നോട്ടീസ് നൽകിയിരിക്കുന്നത്. എഡിജിപിയുടെ ഓഫീസിലെത്തുന്ന വിവിധ ക്രമസമാധാന റിപ്പോർട്ടുകൾ പരിശോധിക്കുന്ന ചുമതല ഈ ഉദ്യോഗസ്ഥർക്കായിരുന്നു. മുൻപ് കേസ് അന്വേഷിച്ച ഉദ്യോഗസ്ഥർ ഉന്നയിച്ച ഗുരുതരമായ വെളിപ്പെടുത്തലുകളുടെയും മൊഴികളുടെയും അടിസ്ഥാനത്തിലാണ് ഈ അടിയന്തര നടപടി.
മുഖ്യമന്ത്രിയുടെ ഗൺമാൻമാർക്കെതിരെ മർദ്ദനത്തിന് തെളിവില്ലെന്ന് കാട്ടി കോടതിയിൽ റിപ്പോർട്ട് നൽകാൻ ഉന്നത ഉദ്യോഗസ്ഥരുടെ ഭാഗത്തുനിന്ന് ശക്തമായ സമ്മർദ്ദം ഉണ്ടായെന്നാണ് മുൻ അന്വേഷണസംഘം ആരോപിച്ചിരുന്നത്. എഡിജിപിയുടെ ഓഫീസിലെ ഈ രണ്ട് എസ്ഐമാരാണ് തങ്ങളെ വിളിച്ച് റിപ്പോർട്ട് മാറ്റാൻ ഭീഷണിപ്പെടുത്തുകയും സമ്മർദ്ദം ചെലുത്തുകയും ചെയ്തതെന്നും, ഇതിനെത്തുടർന്ന് അന്വേഷണ ഉദ്യോഗസ്ഥരിൽ ഒരാൾക്ക് കടുത്ത ദേഹാസ്വാസ്ഥ്യം വരെ ഉണ്ടായെന്നും മുൻ സംഘം മൊഴി നൽകിയിട്ടുണ്ട്. ഈ മൊഴികളിൽ എത്രത്തോളം യാഥാർത്ഥ്യമുണ്ടെന്ന് കണ്ടെത്തുകയാണ് പ്രത്യേക അന്വേഷണസംഘത്തിന്റെ ലക്ഷ്യം. നിലവിൽ ശബരിമല സ്വർണ്ണക്കൊള്ള അന്വേഷിക്കുന്ന പ്രത്യേക സംഘത്തിലെ അംഗമാണ് ചോദ്യം ചെയ്യലിന് ഹാജരാകുന്ന ഗിരീഷ്; ശ്രീകാന്തും ആദ്യഘട്ടത്തിൽ ഈ അന്വേഷണ സംഘത്തിന്റെ ഭാഗമായിരുന്നു.
അതേസമയം, യൂത്ത് കോൺഗ്രസ് പ്രവർത്തകരെ ക്രൂരമായി മർദ്ദിച്ച കേസിൽ പ്രതികളായ മുഖ്യമന്ത്രിയുടെ ഗൺമാൻമാരുടെ മുൻകൂർ ജാമ്യാപേക്ഷയിൽ വരും ശനിയാഴ്ചയും കോടതിയിൽ വാദം തുടരും. കഴിഞ്ഞ ബുധനാഴ്ച കോടതിയിൽ പ്രോസിക്യൂഷനും പ്രതിഭാഗവും തമ്മിൽ ശക്തമായ വാദപ്രതിവാദങ്ങളാണ് നടന്നത്. കേസിൽ പ്രതികൾക്കെതിരെ ജാമ്യമില്ലാ വകുപ്പുകൾ ചുമത്തിയതിന്റെ നിയമപരമായ ആധികാരികതയിൽ കോടതി ചില സംശയങ്ങൾ പ്രകടിപ്പിച്ചിട്ടുണ്ട്. സംഭവം നടന്ന സമയത്ത് പൊലീസ് ഫോട്ടോഗ്രാഫർ ഔദ്യോഗികമായി പകർത്തിയ മർദ്ദനത്തിന്റെ യഥാർത്ഥ ദൃശ്യങ്ങളും ഡിജിറ്റൽ തെളിവുകളുടെ ഫോറൻസിക് പരിശോധനാ റിപ്പോർട്ടുകളും ശനിയാഴ്ചയ്ക്കകം ഹാജരാക്കാൻ കോടതി അന്വേഷണ സംഘത്തോട് കർശനമായി നിർദ്ദേശിച്ചിരിക്കുകയാണ്.
Summary: The Special Investigation Team is set to question two Grade SIs, who previously worked in the office of ADGP MR Ajith Kumar, over allegations of sabotaging the Alappuzha Youth Congress attack case. Former investigating officers alleged that these SIs pressured them to submit a report clearing the Chief Minister’s gunmen due to high-level political influence. Meanwhile, the court has directed the police to produce original footage and forensic reports regarding the incident before continuing the bail hearing this Saturday.
