കണ്ണൂർ: നാടിന്റെ വികസനത്തിന് ഏറ്റവും അനിവാര്യമായ അതിവേഗ റെയിൽപാത പദ്ധതിക്ക് സി.പി.എം പൂർണ്ണ പിന്തുണ നൽകുമെന്ന് പാർട്ടി സംസ്ഥാന സെക്രട്ടേറിയേറ്റ് അംഗം എം.വി ജയരാജൻ വ്യക്തമാക്കി (MV Jayarajan Support High Speed Rail). മുൻ പിണറായി സർക്കാരിന്റെ സ്വപ്ന പദ്ധതിയായിരുന്ന ‘കെ റെയിലിന്’ പകരം ‘ഇന്ത്യ റെയിൽ’ എന്ന് പേരിട്ടായാലും സംസ്ഥാനത്ത് അതിവേഗ പാത വരണമെന്നാണ് സി.പി.എമ്മിന്റെ നിലപാടെന്ന് അദ്ദേഹം കണ്ണൂരിൽ മാധ്യമങ്ങളോട് പറഞ്ഞു. വികസന പദ്ധതികളെ തുടക്കത്തിലേ നശിപ്പിക്കുന്ന സംസ്കാരമാണ് യൂത്ത് കോൺഗ്രസിന്റേതെന്നും എന്നാൽ സി.പി.എമ്മിന് അങ്ങനെയൊരു നിലപാടില്ലെന്നും അദ്ദേഹം കുറ്റപ്പെടുത്തി. നാടിന്റെ പുരോഗതിക്ക് ആവശ്യമായ വികസന പ്രവർത്തനങ്ങളെ പാർട്ടി എപ്പോഴും ഇരുകയ്യും നീട്ടി സ്വാഗതം ചെയ്യുമെന്നും ജയരാജൻ കൂട്ടിച്ചേർത്തു. നേരത്തെ സി.പി.എം സംസ്ഥാന സെക്രട്ടറി എം.വി ഗോവിന്ദനും യു.ഡി.എഫ് സർക്കാരിന്റെ പുതിയ അതിവേഗ പാതാ നീക്കങ്ങളെ സ്വാഗതം ചെയ്ത് രംഗത്തെത്തിയിരുന്നു
അതേസമയം, മെട്രോമാൻ ഇ. ശ്രീധരൻ സമർപ്പിച്ച പുതിയ അതിവേഗ റെയിൽപാത പദ്ധതിയുമായി മുന്നോട്ട് പോകാനുള്ള നീക്കങ്ങൾ സംസ്ഥാന സർക്കാർ സജീവമാക്കിയിരിക്കുകയാണ്. യു.ഡി.എഫ് മുന്നണിയിലും മന്ത്രിസഭായോഗത്തിലും ചർച്ച ചെയ്ത ശേഷം രണ്ടാഴ്ചയ്ക്കുള്ളിൽ പദ്ധതിക്ക് ഗ്രീൻ സിഗ്നൽ നൽകാനാണ് വി.ഡി.എസ് സർക്കാർ ആലോചിക്കുന്നത്. കെ റെയിലിനെ അപേക്ഷിച്ച് സ്ഥലമേറ്റെടുപ്പ് വളരെ കുറവാണെന്നതാണ് ഇ. ശ്രീധരന്റെ പദ്ധതി തിരഞ്ഞെടുക്കാൻ സർക്കാരിനെ പ്രേരിപ്പിക്കുന്നത്. ഇതിൽ 70 ശതമാനത്തോളം പാത തൂണുകളിലൂടെയും 20 ശതമാനം ഭൂഗർഭ പാതയുമായാണ് വിഭാവനം ചെയ്തിരിക്കുന്നത്. തിരുവനന്തപുരം മുതൽ കണ്ണൂർ വരെയുള്ള നിലവിലെ പദ്ധതി കാസർകോട് വരെ നീട്ടുന്ന കാര്യവും സംസ്ഥാനത്തെ നാല് വിമാനത്താവളങ്ങളെ പരസ്പരം ബന്ധിപ്പിക്കുന്ന കാര്യവും സർക്കാരിന്റെ പരിഗണനയിലുണ്ട്. എന്നാൽ, മുൻപ് കെ റെയിലിനെതിരെ രംഗത്തുണ്ടായിരുന്ന സമരസമിതികൾ പുതിയ പദ്ധതിക്കെതിരെയും കടുത്ത എതിർപ്പുമായി രംഗത്തുണ്ട്.
Summary: CPM state secretariat member M.V. Jayarajan announced the party’s full support for a high-speed rail project in Kerala, regardless of whether it is named K-Rail or India Rail. The state government is actively considering Metroman E. Sreedharan’s alternative high-speed rail proposal, which requires significantly less land acquisition by utilizing elevated pillars and underground tunnels. While the CPM leadership welcomes the development, local anti-rail protest committees continue to express strong opposition to the new alignment.
