മസാലബോണ്ട് കേസ്: തോമസ് ഐസക് ഇന്നും ഇഡിക്ക് മുന്നില്‍ ഹാജരാകില്ല
കൊച്ചി: മസാലബോണ്ട് കേസില്‍ തോമസ് ഐസക് ഇന്ന് എന്‍ഫോഴ്‌സ്‌മെന്‍റ് ഡയറക്ടറേറ്റിനു(ഇഡി) മുന്നില്‍ ഹാജരാകില്ല. സമന്‍സ് ചോദ്യംചെയ്ത് ഐസക് നല്‍കിയ ഹര്‍ജിയില്‍ വെള്ളിയാഴ്ച ഹൈക്കോടതി വാദം കേള്‍ക്കാമെന്ന് വ്യക്തമാക്കിയിട്ടുണ്ട്. ഹര്‍ജിയില്‍ കോടതി ഉത്തരവ് അറിഞ്ഞ ശേഷമായിരിക്കും ഹാജരാകുന്നതില്‍ തുടര്‍ നടപടി സ്വീകരിക്കുക.
മസാല ബോണ്ട് അന്വേഷണവുമായി ബന്ധപ്പെട്ട് വെള്ളിയാഴ്ച വരെ തോമസ് ഐസക്കിനെതിരേ മറ്റു നടപടികള്‍ സ്വീകരിക്കരുതെന്ന് ഇഡിക്ക് ഹൈക്കോടതി നിര്‍ദേശം നല്‍കിയിട്ടുണ്ട്. ബോണ്ടുകള്‍ ഇറക്കിയതില്‍ വിദേശനാണ്യ വിനിമയ നിയമത്തിന്‍റെ ലംഘനമുണ്ടോയെന്ന അന്വേഷണത്തിന്‍റെ പേരില്‍ ഇന്ന് ഹാജരാകാന്‍ ആവശ്യപ്പെട്ട് ഇഡിയുടെ പുതിയ സമന്‍സിനെതിരെ തോമസ് ഐസക് നല്‍കിയ ഹര്‍ജിയിലാണ് ജസ്റ്റിസ് ടി.ആര്‍. രവിയുടെ ഇടക്കാല ഉത്തരവ്.