തിരുവനന്തപുരം: പോത്തൻകോട് വെള്ളാണിക്കൽ പാറയിൽ യുവാവിനെയും യുവതിയെയും മരിച്ച നിലയിൽ കണ്ടെത്തി. വെള്ളനാട് മിത്രനികേതൻ സ്വദേശി ഷിബിൻ, ഒരു യുവതി എന്നിവരെയാണ് പാറയ്ക്ക് താഴെയുള്ള ആളൊഴിഞ്ഞ റബ്ബർ തോട്ടത്തിൽ തൂങ്ങിമരിച്ച നിലയിൽ കണ്ടെത്തിയത്. (Man and woman were found hanging, their hands were tied together)
പരസ്പരം ഓരോ കൈകൾ വീതം ചേർത്ത് കെട്ടിയ നിലയിലായിരുന്നു മൃതദേഹങ്ങൾ. ഇന്ന് വൈകുന്നേരം പാറമുകൾ സന്ദർശിക്കാനെത്തിയ വിനോദസഞ്ചാരികളായ യുവാക്കളാണ് റബ്ബർ മരത്തിന്റെ രണ്ട് ശിഖരങ്ങളിലായി തൂങ്ങിനിൽക്കുന്ന മൃതദേഹങ്ങൾ ആദ്യം കണ്ടത്. ഇവർ ഉടൻ തന്നെ താഴെയെത്തി യാത്രക്കാരെയും പോലീസിനെയും വിവരമറിയിക്കുകയായിരുന്നു.
പോത്തൻകോട് പോലീസ് സ്ഥലത്തെത്തി പ്രാഥമിക നടപടികൾ സ്വീകരിച്ചു. മരിച്ചവർ കമിതാക്കളാണെന്നാണ് പോലീസിന്റെ പ്രാഥമിക നിഗമനം. യുവതിയെ തിരിച്ചറിയാനുള്ള ശ്രമങ്ങൾ തുടരുകയാണ്.
