രണ്ടു വയസ്സുകാരന്റെ ഡയപ്പറിനുള്ളിൽ സ്വർണ്ണം ഒളിപ്പിച്ച് കടത്തിയ മലയാളി പിതാവ് പിടിയിൽ
Sun, 19 Mar 2023
ബെംഗളൂരു: കുഞ്ഞിനെ ഉപയോഗിച്ച് വിദേശത്തുനിന്ന് സ്വർണ്ണം കടത്താൻ ശ്രമിച്ച പിതാവ് അറസ്റ്റിൽ. രണ്ട് വയസ്സുള്ള കുഞ്ഞിനെ ഉപയോഗിച്ച് സ്വർണ്ണം കടത്താൻ ശ്രമിക്കവെ മലയാളിയായ പിതാവ് മംഗളൂരു വിമാനത്താവളത്തിൽ കസ്റ്റംസിന്റെ പിടിയിലാവുകയായിരുന്നു. കുഞ്ഞിന്റെ ഡയപ്പറിലും സ്വന്തം ശരീരത്തിലുമായാണ് ഇയാൾ സ്വർണ്ണം ഒളിപ്പിച്ച് കടത്താൻ ശ്രമിച്ചത്. സ്‌കാനിംഗിനിടയിലായിരുന്നു കുട്ടിയുടെ ശരീരത്തിൽനിന്ന് സ്വർണ്ണം കണ്ടെത്തിയത്. സംഭവത്തിൽ ചോദ്യം ചെയ്യുന്നതിനിടയിലാണ് പിതാവിന്റെ ശരീരത്തിൽ നിന്നും പശരൂപത്തിലുള്ള സ്വർണ്ണം കണ്ടെടുത്തത്. കുഞ്ഞിൽനിന്നും പിതാവിൽനിന്നും 1.350 കിലോ സ്വർണമാണ് പിടികൂടിയത്. പിടികൂടിയ സ്വർണത്തിന് 76 ലക്ഷം രൂപയോളം മതിപ്പുണ്ട്. പ്രതി കാസർകോഡ് സ്വദേശിയാണ്. പിതാവും കുഞ്ഞും ദുബായിൽ നിന്നും എത്തിയതായിരുന്നു. കേസിൽ കുഞ്ഞ് ഉൾപ്പെട്ടതിനാൽ മറ്റു വിവരങ്ങൾ അധികൃതർ പുറത്തുവിട്ടിട്ടില്ല.