കോഴിക്കോട്: നഗരമധ്യത്തിലെ പാളയത്ത് യുവാവിനെ വീടിനോട് ചേർന്നുള്ള മുറിയിൽ വെട്ടേറ്റ് മരിച്ച നിലയിൽ കണ്ടെത്തി (Kozhikode palayam youth killed). പുതിയ കോവിലകം സ്വദേശി ബിജു (30) ആണ് കൊല്ലപ്പെട്ടത്. ശരീരത്തിൽ ആഴത്തിലുള്ള വെട്ടേറ്റ മുറിവുകളുള്ളതിനാൽ ഇതൊരു ആസൂത്രിത കൊലപാതകമാണെന്നാണ് പോലീസിന്റെ പ്രാഥമിക നിഗമനം.
ഇന്ന് പുലർച്ചെ മൂന്ന് മണിയോടെയാണ് ക്രൂരമായ കൊലപാതക വിവരം പുറത്തറിയുന്നത്. മകനെ വിളിച്ചുണർത്താനായി വീടിന് പുറത്തുള്ള മുറിയിലെത്തിയ അമ്മയാണ് രക്തത്തിൽ കുളിച്ചുകിടക്കുന്ന ബിജുവിന്റെ മൃതദേഹം ആദ്യം കണ്ടത്. ഈ മുറി പുറത്തുനിന്ന് പൂട്ടിയ നിലയിലായിരുന്നു. ബിജുവിന്റെ കഴുത്തിലും വയറിന്റെ ഭാഗത്തും മാരകമായി വെട്ടേറ്റ പാടുകളുണ്ട്.
ലഹരി മാഫിയകൾ സജീവമായ ഈ പ്രദേശത്ത് പോലീസ് നിരന്തരം നിരീക്ഷണം നടത്താറുള്ളതാണ്. അതുകൊണ്ടുതന്നെ, പ്രദേശത്തെ ഏതെങ്കിലും ലഹരിസംഘങ്ങളുമായി ബന്ധപ്പെട്ടവരാണോ കൊലപാതകത്തിന് പിന്നിലെന്ന് കുടുംബാംഗങ്ങൾ സംശയിക്കുന്നുണ്ട്. സംഭവസ്ഥലത്തെത്തിയ പോലീസ് ഇൻക്വസ്റ്റ് നടപടികൾ പൂർത്തിയാക്കി അന്വേഷണം ഊർജിതമാക്കി. പ്രതികൾക്കായി സമീപത്തെ സിസിടിവി ദൃശ്യങ്ങൾ കേന്ദ്രീകരിച്ച് പരിശോധന നടന്നുവരികയാണ്.
Story Summary:
A 30-year-old youth named Biju was found hacked to death in a room adjacent to his house in Palayam, Kozhikode. The body was discovered by his mother with deep wounds on the neck and abdomen, and the family suspects the involvement of local drug mafia.
