കോഴിക്കോട്: എഐസിസി സംഘടനാ ജനറൽ സെക്രട്ടറി കെ.സി. വേണുഗോപാലിനെതിരെ ആസൂത്രിതമായ രീതിയിൽ സൈബർ ഇടങ്ങളിൽ സംഘടിത ആക്രമണം നടക്കുന്നുണ്ടെന്ന ഗുരുതര ആരോപണവുമായി കോഴിക്കോട് ഡിസിസി പ്രസിഡന്റ് കെ. പ്രവീൺ കുമാർ. കോൺഗ്രസ് പാർട്ടിക്കുള്ളിലെ ആഭ്യന്തര വിഷയങ്ങളിലും സാധാരണ അഭിപ്രായപ്രകടനങ്ങളിൽ പോലും കെ.സി. വേണുഗോപാലിന്റെ പേര് വലിച്ചിഴച്ച് മനഃപൂർവ്വം വേട്ടയാടാനാണ് ചിലർ ശ്രമിക്കുന്നത് എന്നും അദ്ദേഹം ചൂണ്ടിക്കാട്ടി.(Kozhikode DCC President Praveen Kumar Alleges Planned Cyber Attack Against KC Venugopal)
ഇത് ഒരുതരത്തിലും അനുവദിച്ചുകൊടുക്കാൻ കഴിയില്ലെന്ന് പ്രവീൺ കുമാർ വ്യക്തമാക്കി. കോൺഗ്രസിനെ അധികാരത്തിൽ എത്തിക്കുന്നതിലും മികച്ച വിജയം സമ്മാനിക്കുന്നതിലും വലിയ പങ്ക് വഹിച്ച നേതാവാണ് കെ.സി. വേണുഗോപാൽ. ഈ നേട്ടങ്ങളെയെല്ലാം വിസ്മരിപ്പിക്കാനും അദ്ദേഹത്തിന്റെ പ്രതിച്ഛായ തകർക്കാനുമായി ഒരു വലിയ റാക്കറ്റ് തന്നെ പിന്നിൽ പ്രവർത്തിക്കുന്നുണ്ട്. ഈ ദുരൂഹ നീക്കങ്ങൾക്ക് പിന്നിൽ കോൺഗ്രസ് പ്രവർത്തകരല്ലെന്നും കടുത്ത ദുരുദ്ദേശ്യത്തോടെയുള്ള പ്രവൃത്തികളാണെന്നും പ്രവീൺ കുമാർ പറഞ്ഞു.
വിഷയത്തിൽ സമഗ്രമായ അന്വേഷണം ആവശ്യപ്പെട്ട് കേന്ദ്ര ആഭ്യന്തരമന്ത്രിക്ക് പരാതി നൽകിയിട്ടുണ്ട്. അഞ്ച് സോഷ്യൽ മീഡിയ അക്കൗണ്ടുകളുടെ വിശദാംശങ്ങൾ സഹിതമാണ് പരാതി നൽകിയത്. ഇതിൽ നാല് അക്കൗണ്ടുകളും കോൺഗ്രസിന്റെ പേരിലുള്ള വ്യാജ പ്രൊഫൈലുകളാണെന്ന് കണ്ടെത്തിയിട്ടുണ്ട്. ഇതിന് പിന്നിൽ പ്രവർത്തിച്ച ഉന്നതൻ ആരായാലും പുറത്തുവരട്ടെയെന്നും അദ്ദേഹം കൂട്ടിച്ചേർത്തു.
Story Summary
Kozhikode DCC President K Praveen Kumar alleged a well-planned cyber attack against AICC General Secretary KC Venugopal aimed at tarnishing his image. A complaint listing five suspicious social media accounts, including four fake profiles operating under the guise of Congress, has been submitted to the Home Minister for detailed investigation.
