തിരുവനന്തപുരം: സ്ത്രീകൾക്കായി നടപ്പിലാക്കിയ ക്ഷേമപദ്ധതികളിൽ നിന്ന് സർക്കാർ പിന്മാറുന്നതും നിലവിൽ ലഭിച്ചുവരുന്ന ആനുകൂല്യങ്ങൾ അവസാനിപ്പിക്കാൻ ശ്രമിക്കുന്നതും പ്രതിഷേധാർഹമാണെന്ന് എംഎൽഎ കെ.എൻ. ബാലഗോപാൽ ആരോപിച്ചു (K N Balagopal). മുൻ എൽഡിഎഫ് സർക്കാർ നടപ്പിലാക്കിയ മുഖ്യമന്ത്രിയുടെ സ്ത്രീ സുരക്ഷാ ധനസഹായ പദ്ധതിയെ സംബന്ധിച്ച് നിലവിലെ സർക്കാർ സ്വീകരിക്കുന്ന നിലപാടിനെതിരെയാണ് അദ്ദേഹം രംഗത്തെത്തിയത്.
35 മുതൽ 60 വയസ്സ് വരെയുള്ള സ്ത്രീകൾക്കായി രൂപകൽപ്പന ചെയ്ത ഈ പദ്ധതിയിലൂടെ പ്രതിമാസം 1,000 രൂപ വീതം ധനസഹായം നൽകുന്നുവെന്നും, കേരളത്തിലാകെ 30 ലക്ഷത്തിലധികം സ്ത്രീകളെ ലക്ഷ്യമിട്ടാണ് പദ്ധതി നടപ്പിലാക്കിയതെന്നും ബാലഗോപാൽ വ്യക്തമാക്കി. ഇതുവരെ ഏകദേശം 20 ലക്ഷം സ്ത്രീകൾ പദ്ധതിയുടെ ഗുണഭോക്താക്കളായി മാറിയിട്ടുണ്ടെന്നും അദ്ദേഹം പറഞ്ഞു.
പദ്ധതിയുടെ നടത്തിപ്പിനായി എൽഡിഎഫ് സർക്കാരിന്റെ അവസാന ബജറ്റിൽ 3,720 കോടി രൂപ വകയിരുത്തിയിരുന്നുവെന്ന് ചൂണ്ടിക്കാട്ടിയ ബാലഗോപാൽ, സ്ത്രീകൾക്കായുള്ള സൗജന്യ ബസ് യാത്രാ പദ്ധതിക്കായി ചെലവാകുന്ന തുകയെക്കാൾ പലമടങ്ങ് കൂടുതലാണ് ഈ പദ്ധതിക്കായി നീക്കിവെച്ചതെന്നും വ്യക്തമാക്കി.
പദ്ധതിയിൽ അംഗത്വം നൽകുന്നതിനുള്ള മാനദണ്ഡങ്ങൾ സർക്കാർ തന്നെ വ്യക്തമായി നിശ്ചയിച്ചിരുന്നുവെന്നും, തദ്ദേശ സ്വയംഭരണ സ്ഥാപനങ്ങളിലെ സെക്രട്ടറിമാരുടെ നേതൃത്വത്തിലാണ് അപേക്ഷകൾ സ്വീകരിക്കുകയും പരിശോധിക്കുകയും ചെയ്തതെന്നും അദ്ദേഹം പറഞ്ഞു. എല്ലാ യോഗ്യതാ മാനദണ്ഡങ്ങളും വിലയിരുത്തിയ ശേഷമാണ് അപേക്ഷകൾ അംഗീകരിച്ചതെന്നും, ഇതുമായി ബന്ധപ്പെട്ട് കാര്യമായ പരാതികളോ ആക്ഷേപങ്ങളോ ഉയർന്നിട്ടില്ലെന്നും അദ്ദേഹം കൂട്ടിച്ചേർത്തു.
സ്ത്രീ സുരക്ഷാ ധനസഹായ പദ്ധതിയെ കുറിച്ച് മുഖ്യമന്ത്രി നടത്തുന്ന പ്രസ്താവനകൾ വസ്തുതാവിരുദ്ധവും പൊതുജനങ്ങളിൽ തെറ്റിദ്ധാരണ സൃഷ്ടിക്കുന്നതുമാണെന്ന് ആരോപിച്ച ബാലഗോപാൽ, രാജ്യത്തെ തന്നെ വലിയ സ്ത്രീക്ഷേമ പദ്ധതികളിലൊന്നായ ഈ പദ്ധതിയെ ദുർബലപ്പെടുത്താനുള്ള ശ്രമമാണോ നടക്കുന്നതെന്ന് സംശയിക്കേണ്ട സാഹചര്യമുണ്ടെന്നും പറഞ്ഞു.
Story Summary:
MLA K.N. Balagopal has criticized the government’s stance on the Chief Minister’s Women Safety Financial Assistance Scheme. He alleged that attempts are being made to weaken a major welfare initiative that benefits lakhs of women across Kerala.
